ცენტრი ,,ემპათია”, საქართველოს მე-3 პრეზიდენტის მიხეილ სააკაშვილის ჯანმრთელობის მდგომარეობასთან დაკავშირებით, საბოლოო დასკვნას აქვეყნებს. 16 ექსპერტისგან შემდგარმა კომისიამ 6-თვიანი კვლევის შედეგი, საბოლოო ანგარიში წარადგინა, სადაც საუბარია 20-ზე მეტ დადასტურებულ სამედიცინო დიაგნოზზე. ამასთან დაკავშირებით, საგანგებო ბრიფინგზე, განცხადებას აკეთებს მარიამ ჯიშკარიანი:
,,დასკვნის მომზადებაში, ექსპერტიზაში მონაწილეობდა 16 ექსპერტი – 10 ქართველი და 6 საერთაშორისო ექსპერტი.
ექსპერტთა კომისია ერთხმად მივიდა დასკვნამდე, რომ მიხეილ სააკაშვილის ყოფნა საქართველოს ციხეთა სისტემაში არის შეუძლებელი. მისი ჯანმრთელობის მდგომარეობიდან და ასევე უსაფრთხოების სტანდარტებიდან გამომდინარე იგი სასწრაფოდ უნდა იყოს გადაყვანილი აშშ-ს ან ევროკავშირის მე-3 დონის საუნივერსიტეტო კლინიკაში, რათა მოხდეს ზუსტი დიაგნოსტიკა, შემდგომში კი მკურნალობა და რეაბილიტაცია.
იგი პრაქტიკულად ჯანმრთელი შევიდა სასჯელაღსრულების დაწესებულებაში. 2021 წლის 17-19 ნოემბერს მე-18 დაწესებულებაში დიაგნოზის დადგენამდე მას არ გააჩნდა არანაირი ნევროლოგიური დიაგნოზი.
ამჟამად გამოსაკვლევ პირს აღენიშნება სიმპტომები და დიაგნოზები – ნეიროფსიქიკური, გასტროენტეროლოგიური, ასევე საყრდენ-მამოძრავებელი სისტემის და მხედველობის მხრივ, აღენიშნება დაუდგენელი ეტიოლოგიის ცხელება, ანორექსია, წონაში კლება, კუნთების განლევა, სახსრების კუნთების და ძვლების ტკივილი, ასევე ნაკაწრები მთელ სხეულზე, რომელიც შესაძლოა წარმოადგენდეს დაუდგენელი ინფექციური პროცესის ან/და ინტოქსიკაციის კვალს.
თქვენ იცით, რომ თმაში აღმოჩენილი იქნა ლიმიტირებულ ზღვარზე მეტი ბისმუტი, ასევე მერკური ანუ ვერცხლისწყალი და ბარიუმი. ეს ტოქსიკური ნივთიერებები საშიშია იმით, რომ მათ შეუძლიათ გამოიწვიონ არა მხოლოდ ფიზიკური, არამედ ფსიქიკური ფსიქიკური დარღვევებიც და პატიმრის / გამოსაკვლევი პირის ინვალიდიზაცია, შემდგომში გარდაცვალებაც კი.
აუცილებელია დროული დიაგნოსტიკა ტოქსიკური აგენტების, მათ შორის, ქიმიური შენაერთებისა და რადიაქტიური ნივთიერებების მიმართულებით. წინააღმდეგ შემთხვევაში, ინტოქსიკაციის ალბათობის გათვალისწინებით, მოსალოდნელია კომა და სიკვდილი“, – განაცხადა მარიამ ჯიშკარიანმა.
ავტორი
ნინი ხიჯაკაძე
