პარლამენტში სახალხო დამცველი კანდიდატის შერჩევასთან დაკავშირებით კონსულტაციები მიმდინარეობს. აღსანიშნავია, რომ ოპოზიციას უკვე აქვს მიღებული გადაწყვეტილება და მხარს უჭერენ მესამე სექტორის მიერ წარდგენილ კანდიდატებს – ანა აბაშიძეს, გიორგი ბურჯანაძეს, ნაზი ჯანეზაშვილს. საყურადღებოა, რომ აღნიშნული კანდიდატების მიმართ “ქართულ ოცნებაში” მხარდაჭერას არ აცხადებენ, თუმცაღა მმართველმა პარტიამ თავიდანვე დააფიქსირა პოზიცია, რომ მათ არ ეყოლებოდათ საკუთარი კანდიდატი. ევროკომისიის რეკომენდაციის შესაბამისად სახალხო დამცველი ხელისუფლებასა და ოპოზიციის შორის შეთანხმებით უნდა შეირჩეს. პარლამენტში მიმდინარე პროცესთან დაკავშირებით ჟურნალისტებთან პოზიციას პარლამენტის თავმჯდომარე, შალვა პაპუაშვილი აფიქსირებს და ოპოზიციის მიმართ კრიტიკას გამოთქვამს:
“ვნახეთ, რომ იყო მცდელობა [ოპოზიციის] ნაწილის მხრიდან, რომ თავიდანვე მოეხდინათ პროცესის დისკრედიტირება. ამას, მათ შორის, ემსახურებოდა პროცესში დასაწყისშივე საბოლოო კანდიდატების დასახელება, ისე რომ ალტერნატივიულ ვარიანტს არც კი უშვებდნენ.
ჩვენ ვფიქრობთ, რომ მნიშვნელოვანია, რომ კანდიდატზე შეთანხმება მალე მოხდეს. მთავარი პირობაა, რომ ის უნდა იყოს თანაბრად მისაღები იმ კოალიციური უმრავლესობისთვის, რომლისთვისაც საჭიროა ომბუდსმენის არჩევა და რა თქმა უნდა, უპირველეს ყოვლისა, მისაღები უნდა იყოს “ქართული ოცნებისთვის”, როგორც ამ პარლამენტში უმრავლესობის მქონე პარტიისთვის, რომელიც ჩვენი ქვეყნის უმრავლესობას წარმოადგენს,”- განაცხადა შალვა პაპუაშვილმა.
