მასწავლებლების პრობლემებზე ემოციურად ისაუბრა ტელეკომპანია “ჯორჯიან თაიმსის” ეთერში გამართულ დებატებში, პარტია “სტრატეგია აღმაშენებლის” პოლიტიკური საბჭოს წევრმა, განათლების მიმართულების ხელმძღვანელმა, ნანა ტოხვაძემ.
“რატომ გგონიათ, რომ ვინც სახელმწიფოსგან თავსმოხვეული გამოცდა დროებით ვერ ჩააბარა, სხვაზე ნაკლებად ასწავლის? საერთოდ რაზე ვკამათობთ?! ამის შესახებ პირველად გაიგეთ? ყოველ თვე იფიცებიან სასწრაფოს ექიმები იმიტომ, რომ 300 ლარზე ვეღარ უზრუნველყოფენ ოჯახებს. მასწავლებლებს კი, თქვენ რომ 1400 ლარი გგონიათ, 1080 ლარი აქვთ.
მასწავლებელს, რომელსაც ოჯახი 3-4 შვილი ჰყავს, სტუდენტი ჰყავს სარჩენი, კომუნალური თუ გადასახადები აქვს და თან ბანკი ახრჩობს, ეს საკმარისია?! ამას ჰქვია ღირსეული ცხოვრება?!
აღარაფერს ვამბობ სახელოვნებო და სამუსიკო სკოლების პედაგოგებზე. მათი ანაზღაურება 125 ლარია, მაქსიმუმ 240 ლარამდე. ამას ჰქვია დღეს ხელფასი და მისი შრომის ანაზღაურება?!
ეს ნიშნავს, რომ დღეს სახელმწიფო არ გვაქვს!
ნეტავ გამაგებინა, რას ერჩიან და ემართლებიან პედაგოგებს ამ ქვეყანაში?!
ხალხო, განათლების სფერო ყველაზე დაბალანაზღაურებადი და დაუფასებელია!
მაგრამ განტევების ვაცი ხომ სულ საჭიროა…” – აცხადებს ნანა ტოხვაძე.
