მასწავლებლების პროფესიული დღის აღნიშვნასთან ერთად პედაგოგების პრობლემებზე, მათი მიმართ არასათანადო ყურადღების გამოჩენაზე საუბრობს პარტია “სტრატეგია აღმაშენებლის” პოლიტიკური საბჭოს წევრი, განათლების მიმართულების ხელმძღვანელი, ნანა ტოცვაძე.
“მასწავლებელზე მეტად არცერთი ჩინოვნიკი არ ემსახურება ქვეყანას. რას აკეთებენ მაღალი თანამდებობის პირები ჩვენი ეროვნული მიზნების ხორცშესხმისთვის? ნუთუ ჩინოვნიკების წვლილი ამ ქვეყნის განვითარებაში იმაზე მეტია, ვიდრე ერთი რიგითი მასწავლებლის?!
საუბედუროდ, დღეს, მასწავლებლის დაფასება და მისი ყოველდღიური შრომის შეფასება „სახელმწიფო მესვეურებს“ მხოლოდ მასწავლებლის დღეს, 5 ოქტომბერს ახსენდებათ და ვალის გადახდა ყვავილების თაიგულის მირთმევა ჰგონიათ! ოდესმე თუ დაინტერესებულან მასწავლებელთა შრომის პირობებით, სადაზღვევო პირობებით, გაუსაძლისი საბანკო ვალდებულებებით, უსამართლო პოლიტიკური წნეხით თუ ყოველდღიური გასაჭირით?
მუდამ მომღიმარ, მოტივირებულ, ენთუზიასტ, ცოდნის გამცემ, გამბედავ, მაგალითის მიმცემ და ცხოვრების მასწავლებლებსაც აქვთ ყოფითი, დაუძლეველი პრობლემები! დღეს მათზე ზრუნვა და მათი ღვაწლის დაფასება ნიშნავს უკეთეს ხვალინდელ დღეს. მასწავლებლებს აქვთ ძალაუფლება ქვეყნის მომავალზე. მათ ხელშია ჩარხი, რომელმაც ქვეყნის ბედი და ხვალინდელი დღე უნდა გამოაწახნაგოს. გვახსოვდეს, რომ – „სკოლის მასწავლებლები ფლობენ ისეთი ძალაუფლებას, რომელზეც პრემიერ-მინისტრებს მხოლოდ ოცნება შეუძლიათ“, – თქვა თავის დროზე უინსტონ ჩერჩილმა…
ძვირფასო მასწავლებლებო, გილოცავთ თქვენს პროფესიულ დღეს! გისურვებთ, სათანადოდ დაფასებულიყოს თქვენი შრომა და ღვაწლი მომავალი თაობების წინაშე!” – აცხადებს ნანა ტოხვაძე.
ინფორმაციისთვის: 5 ოქტომბერს მსოფლიოს 100-ზე მეტ ქვეყანაში მასწავლებელთა საერთაშორისო დღეს აღნიშნავენ, ამ დღის აღნიშვნა კი სათავეს 1994 წლის 5 ოქტომბრიდან იღებს, როდესაც იუნესკოსა და შრომის საერთაშორისო ორგანიზაციის მიერ მოწვეულ კონფერენციაზე შემუშავდა რეკომენდაცია “მასწავლებელთა მდგომარეობის შესახებ”. ეს იყო პირველი საერთაშორისო დოკუმენტი, რომელიც განსაზღვრავდა მასწავლებელთა შრომის პირობებს.
