საქართველოს მთავრობა 2013 წლამდე გამოშვებული ავტომობილების იმპორტის აკრძალვას განიხილავს. აღნიშნული ცვლილების შედეგად, ავტომობილების ბიზნესში მოსალოდნელ შედეგებთან დაკავშირებით სააგენტო ,,პარალელთან“ კონკრეტულ განმარტებას აკეთებს საქართველოს ავტოიმპორტიორთა ასოციაციის თავმჯდომარე ლაშა დარბაისელი:
,,რა თქმა უნდა, ახალ ავტომობილებს აქვს წილი, თუმცა მნიშვნელოვან როლს თამაშობს 2013 წლამდე გამოშვებული ავტომობილები. სიძველის თვალსაზრისით, 2000-დან 2002 წლამდე გამოშვებული მანქანები შეგვიძლია მოვიაზროთ, როგორც ძველი ტიპის.
აქ, როდესაც საუბარია 2012 წლიან ავტომობილზე, როგორც დაძველებულად – იმ პირობებში, როცა ჩვენი ქვეყნის მოქალაქეების ეკონომიკური მდგომარეობა არც თუ სახარბიელოა და არ აქვს არჩევნის საშუალება. ასეთ სიტუაციაში ადამიანი არჩევანს აკეთებს პირველ რიგში – დღიურ სარჩოზე, საყოფაცხოვრებო ნივთებზე და არა ავტომობილზე.
ჩვენი სექტორისთვის ეს არის კატასროფა და უზარმაზარი ზიანი მიადგება. თუ გვინდა დავაკმაყოფილოთ ევროპული სტანდარტები, მაშინ კონკრეტულ წლოვანებაზე კი არ უნდა გავამახვილოთ ყურადღება, არამედ მანქანის მდგომარეობაზე. მაგალითად ევროპის ბევრ ქვეყანაში არის ძველი წლოვანების მანქანები, თუმცა გამართულ მდგომარეობაში.
მაშინ ვსვამ კითხვას: საქართველოს მოსახლეობას აქვს იმდენი ფინანსური შესაძლებლობა, რომ შეიძინოს ახალი წლოვანების მანქანები და მაინც ჯიუტად მოძრაობენ 2013 წლამდე გამოშვებული ავტომობილებით?!
ჩვენ ვართ განვითარებადი ქვეყანა, ჩვენი მოსახლეობის ინტერესი და სოციალურ-ეკონომიკური მდგომარეობა განახვავებულია. შესაბამისად, რეგულაციები და კანონპროექტები პირველ რიგში მორგებული უნდა იყოს საქართველოს მოსახლეობის ინტერესებს. ასევე, თუ როგორ იმოქმედებს მიღებული კანონპროექტი ავტომობილების ბიზნესის ფუნქციონირებაზე“, – განაცხადა ლაშა დარბაისელმა.
ავტორი
ნინი ხიჯაკაძე
