პოლიტიკური პლატფორმა “სტრატეგია აღმაშენებლის” განცხადებას ავრცელებს სახალხო დამცველის კანდიდატურის შერჩევის პროცესთან დაკავშირებით:
“რაც შეეხება სახალხო დამცველის არჩევის საკითხს: ჩვენ, „სტრატეგია აღმაშენებლის“ გუნდი, მონაწილეობას არ ვიღებთ პარლამენტის თავმჯდომარესთან ამ საკითხზე გამართულ კონსულტაციებში, რადგან მათ მიერ ინიცირებული ცვლილებები არ შეესაბამება ევროპული რეკომენდაციის იმ პრინციპებს, რომლებიც მოითხოვდა, რომ ყოფილიყო უფრო მეტი ჩართულობა არასამთავრობო ორგანიზაციების მხრიდან, ყოფილიყო უფრო მეტი გამჭვირვალობა და ღიაობა რითიც მოხდებოდა სახალხო დამცველის ინსტიტუტის კიდევ უფრო მეტად დამოუკიდებლობა.
”ქართულმა ოცნებამ“ კი პირიქით, წამოიწყო პროცესი, რომელიც არ არის არც გამჭვირვალე და არც ინკლუზიური, რადგან პარლამენტის თავმჯდომარეს შესაძლებლობას აძლევს განსაზღვროს იმ სამუშაო ჯგუფის შემადგენლობა, რომელიც მოახდენს კანდიდატების შეფასებას, რაც წარმოადგენს მიზანმიმართულ ხელის შეშლას და სამოქალაქო სექტორის მიერ წამოწყებული პროცესის დაზიანებას.
შესაბამისად, მიგვაჩნია, რომ პროცესი არის ფსევდოინკლუზიური, ფსევდოგამჭვირვალე, ფსევდოდემოკრატიული და ხელისუფლების მიერ იმიტირებულ დემოკრატიულ პროცესში „სტრატეგია აღმაშენებელი“ მონაწილეობას ვერ მიიღებს, რადგან „ოცნების“ მიერ წამოწყებული ეს პროცესი მიზნად ისახავს საკუთარი სასურველი კანდიდატის გაყვანას”, – ნათქვამია “სტრატეგია აღმაშენებლის” განცხადებაში.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
