პირდაპირ გეუბნებით, რომ გადმომაბარონ უფლებამოსილება მთლიანად დავალაგებ ამ საკითხს, როგორც უკრაინასთან ასევე ბრიუსელთან და ვაშინგტონთან – ამის შესახებ „სტრატეგია აღმაშენებლის“ ლიდერმა გიორგი ვაშაძემ განაცხადა. ოპოზიციონერი ლიდერი ამბობს, რომ დარჩენილ 2 კვირაშიც კი შესაძლებელია ყველაფერი ჩვენი ქვეყნის სასიკეთოდ შევცვალოთ, უბრალოდ ამისთვის მას შესაძლებლობა და უფლება მოსილება სჭირდება.
„მე მაგალითად პრემიერ ღარიბაშვილის ადგილზე ყოველ თვეში 2-ჯერ ჩავიდოდი კიევში და მათთან ერთად, მხარდამხარ ვიქნებოდი ჩართული დიპლომატიურ სამუშაოებში, როგორც უკრაინის ასევე საქართველოს მხარდაჭერისთვის, ასეთ შემთხვევაში დამერწმუნეთ, რომ კითხვაც კი არ დაისმებოდა, თუ რატომ უნდა მიეცეს საქართველოს კანდიდატის სტატუსი, ყოველგვარი პირობების გარეშე?!
სამწუხაროდ „ქართულმა ოცნებამ“ აირჩია საპირისპირო გზა: მათ აირჩიეს ზელენსკიზე თავდასხმის გზა, მათ აირჩიეს ანტიუკრაინული გზა, მათ აირჩიეს ანტიდასავლური კამპანია, აირჩიეს ევროპარლამენტარებზე შეტევის განხორციელება, სენატორების და კონგრესმენების მტრებად გამოცხადება, ომის დაწყებაში დასავლეთის დადანაშაულება, ამის შემდეგ უკაცრავად მაგრამ თქვენ რას ელოდებით?! ელოდებით, რომ კიდევ უკრაინამ უნდა თქვას, რომ საქართველოს ჩემთან ერთად უნდა მიეცეს კანდიდატის სტატუსი?
ორი კვირაა დარჩენილი საბოლოო პასუხამდე, მე რომ ახლა შესაძლებლობა მომეცეს, პირდაპირ გეუბნებით, რომ გადმომაბარონ უფლებამოსილება მთლიანად დავალაგებ ამ საკითხს, როგორც უკრაინასთან ასევე ბრიუსელთან და ვაშინგტონთან, კანდიდატის სტატუსსაც მივიღებთ და უკრაინა თვითონ იტყვის, პირდაპირ ზელენსკის ვათქმევინებ, რომ საქართველოს ჩვენთან ერთად მიეცით კანდიდატის სტატუსი, უბრალოდ ამ შედეგის მისაღწევად შესაძლებლობა, უფლებამოსილება უნდა მქონდეს, რომელიც სამწუხაროდ არ მაქვს. დარჩენილ 2 კვირაშიც კი შესაძლებელია ამ ყველაფრის გაკეთება“, – განაცხადა გიორგი ვაშაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
