ლეიბორისტული პარტიის თავმჯდომარე, საქართველოში აშშ-ს ელჩის, კელი დეგნანის განცხადებას ეხმაურება პოლიტიკური სპექტრის ერთიანობასთან დაკავშირებით:
“ესე იგი ივანიშვილის, კობახიძის, პაპუაშვილის, ელისაშვილის გვერდზე უნდა დავდგე? და ამას მოგვიწოდებს ამერიკის ელჩი?!
არ დაიჯეროთ, რომ ეს ამერიკის პოზიციაა. ეს ამ ქალბატონის პირადი ურთიერთობის თემაა ივანიშვილთან, რაც ძალიან სამწუხაროა.
თუ ასე მნიშვნელოვნად მიაჩნდა პარლამენტში მუშაობა, რატომ არ ამოიღო ხმა, როცა დეპუტატობიდან გამრიცხეს და ლეიბორისტული პარტია აკრძალეს?!
ნუ მოკლედ ყველაფერი გასაგებია. კიდევ ერთხელ მოვუწოდებ პრეზიდენტ ბაიდენს ეს ქალბატონი სადმე სხვაგან დააწინაუროს ოღონდ არა საქართველოში“, – წერს ფეისბუქის პირად გვერდზე შალვა ნათელაშვილი.
ინფორმაციისთვის – საქართველოში აშშ-ს ელჩის, კელი დეგნანის პოზიცია ერთიანობასთან დაკავშირებით:
“უკრაინასა და აქ, საქართველოში, გარკვეულ ადამიანებს შორის, ურთიერთბრალდებების საკითხს რაც შეეხება – მე არ მომისმენია, რომ რომელიმე პოლიტიკური ლიდერი ცდილობს ჩაითრიოს საქართველო ომში. სინამდვილეში, მე მოვისმინე, რომ ადამიანები არიან ძალიან ფრთხილი და ძალიან სენსიტიური იმ ფაქტთან მიმართებაში, რომ საქართველოს ტერიტორიაზე უკვე განთავსებულია რუსული ძალები.
საქართველომ უკვე გამოიარა საკუთარ მოქალაქეებზე რუსეთის ძალების თავდასხმისა და ტერიტორიის ოკუპაციის მტკივნეული გამოცდილება.
ასე რომ, ვფიქრობ, ნამდვილად სასარგებლო იქნება ახლა, როდესაც ყველა ერთად უნდა დადგეს ყველასთვის, შეწყდეს ერთმანეთზე თავდასხმები“, – განაცხადა კელი დეგნანმა.
