“კრიმინალები არიან კვლავაც უკრაინის ხელისუფლებაში!” – ირაკლი კობახიძე

უკრაინაში დაგეგმილ ვიზიტთან და საქართველო-უკრაინას შორის ურთიერთობების საკითხთან დაკავშირებით კომენტარს აკეთებს პარტია ,,ქართული ოცნება – დემოკრატიული საქართველოს“ თავმჯდომარე ირაკლი კობახიძე:

,,პარლამენტის თავმჯდომარის ვიზიტი და მმართველი პარტიის თავმჯდომარის ვიზიტი რანგით გამოდის ერთი და იგივე. ჩვენ, შესაბამისად, ამ რანგის ვიზიტის ორგანიზებისთვის გვჭირდება გარკვეული წინაპირობების არსებობა, რაც არის ჩვენი მხრიდან არა რაღაც თვითმიზანი, არამედ ეს არის ელემენტარულად ჟესტის მოთხოვნა იმასთან დაკავშირებით, რომ მეგობრობის სურვილი აქვს ხელისუფლებას.

მეგობრობა არის აბსოლუტურად სუფთა ორ ქვეყანასა და ორ ხალხს შორის, მაგრამ, სამწუხაროდ, ეს 100%-ით არ გადაიზარდა ხელისუფლებებს შორის მეგობრობაში, რასაც აქვს ერთი სამწუხარო მიზეზი – კრიმინალები არიან კვლავაც უკრაინის ხელისუფლებაში!

არავითარ ულტიმატუმი არ არის აქ. უბრალოდ, როდესაც საუბარია ხელისუფლებებს შორის ჯანსაღ ურთიერთობებზე – ასეთ დროს პრინციპულია, რომ ერთ ხელისუფლებას მეორე ხელისუფლების მიერ კრიმინალად აღიარებული პირები არ ჰყავდეს თავისთან.

თქვენ წარმოიდგინეთ ერთი წამით, მაგალითად, იანუკოვიჩი რომ იყოს ჩვენი რეფორმების საბჭოს ხელმძღვანელი, რა თქმა უნდა, ეს გააფუჭებდა ურთიერთობას საქართველოსა და უკრაინას შორის“, – განაცხადა ირაკლი კობახიძემ.

ავტორი
ნინი ხიჯაკაძე