“მიხეილ სააკაშვილი არ არის ბათუმში, ვიდეო არ არის ჩაწერილი საქართველოში – ეს არის ის, რაც თამამად შემიძლია გითხრათ” – ირაკლი კობახიძე

მიხეილ სააკაშვილის მიერ გავრცელებულ ვიდეოებს ეხმიანება „ქართული ოცნების“ თავმჯდომარე, ირაკლი კობახიძე და ამტკიცებს, რომ საქართველოს მე-3 პრეზიდენტი არ იმყოფება საქართველოში და არც ვიდეოა საქართველოში გადაღებული:

„ხვალ არის არჩევნების დღე და ამ არჩევნებზე ქართველმა ხალხმა კიდევ უნდა გამოხატოს თავისი ნება. მოძალადეები და მოიღალატეები კოალიციური მთავრობით გვემუქრებიან. ხვალ არის თვითმმართველობის არჩევნები და ბუნებრივია მნიშვნელოვანია საზოგადოების მობილიზება, იმისათვის რომ დაფიქსირდეს სათანადო შედეგი და გაგრძელდეს ადგილობრივი თვითმმართველობის შემდგომი განვითარება.

რაც შეეხება სააკაშვილს, პირველი – სააკაშვილი საქართველოში არ არის;

მეორე – ეს ადამიანი არის კლოუნი, ამას გეუბნებოდით გუშინ, გუშინწინ, მანამდეც და ეს კიდევ ერთხელ დადასტურდა მის მიერ;

მესამე – ნეტავ ყოფილიყო საქართველოში, ამ შემთხვევაში სრულიად ქართული საზოგადოება დაინახავდა თუ როგორი კლოუნია მიხეილ სააკაშვილი და ამით საბოლოოდ დასრულდებოდა ის სიმახინჯე, რომელიც არის ქართულ პოლიტიკაში, მათ შორის, პოლარიზაციის კუთხით.

კიდევ ერთხელ ვიმეორებ, მიხეილ სააკაშვილი არ არის ბათუმში, ვიდეო არ არის ჩაწერილი საქართველოში. ეს არის ის, რაც თამამად შემიძლია გითხრათ,” – განაცხადა ირაკლი კობახიძემ.