“საარჩევნო რეფორმის პროცესში საკანონმდებლო ცვლილებებთან ერთად მნიშვნელოვანია ტექნოლოგიური ნაწილიც” – დავით ცეკვავა

საარჩევნო კოდექსში შესატან ცვლილებებთან დაკავშირებით სააგენტო ,,პარალელთან“ ისაუბრა ,,სტრატეგია აღმაშენებლის“ პოლიტიკური საბჭოს წევრმა დავით ცეკვავამ:

,,საარჩევნო რეფორმის პროცესში საკანონმდებლო ცვლილებებთან ერთად მნიშვნელოვანია ტექნოლოგიური ნაწილიც. ამ საქმიანობაში რამდენიმე თვის განმავლობაში ჩართული იყო მთლიანი ოპოზიციური სპექტრი.

უნდა აღინიშნოს, რომ ბოლო 30 წლის განმავლობაში არც ერთ ხელისუფლებას, იდეის დონეზეც კი, არ განუხილავს ამ მასშტაბის ტექნოლოგიური ცვლილებები საარჩევნო კოდექსში.

შარლ მიშელის დოკუმენტზე ხელმომწერი ოპოციური პარტიები ,,ქართულ ოცნებასთან“ და ცესკოსთან შევთანხმდით და სამუშაო პროცესი დავყავით 2 ნაწილად:

1. ის ნაწილი, რომელიც მოესწრება ადგილობრივი თვითმმართველობის არჩევნებისთვის;
2. ის ნაწილი, რომელიც მოესწრება პროცედურულად და ტექნიკურად, შემდეგი საპარლამენტო არჩევნებისთვის.

გამოიკვეთა საკითხები, რომლებიც ახალ საარჩევნო კოდექსში იქნება გათვალისწინებული: ძველი პირადობის მოწმობები ჩანაცვლდება ახალი ID ბარათებით, მათ შორის მოსახლეობას, ვისაც სურვილი ექნება გაიცემა “უჩიპო” ბარათები; ამომრჩევლის ელექტრონული იდენტიფიკაციის საშუალებების დანერგვა, მაგალითად სახის ამოცნობის ტექნოლოგიური გადაწყვეტილება, უკიდურეს შემთხვევაში უბნების გარკვეულ რაოდენობაზე პილოტური ვერსიაც; ახალი ტიპის ბარკოდირებული ბიულეტენი; მაღალი რეზოლუციის კამერის პირობებში ხმების დათვლის პრცესის უწყვეტი ჩაწერა.

ადგილობრივი თვითმმართველობის არჩევნებისთვის მოსწრებადია, სრულად დანერგვის თვალსაზრისით, ხმის მიცემის პროცესის ნაწილი, რომელიც ითვალისწინებს ახალი ტიპის ბიულეტენის დანერგვას ელექტრონული აღრიცხვის სისტემით, სადაც სრულად დაცულია ამომრჩევლის არჩევანის ფარულობა. კონკრეტული გადაწყვეტილება წარმოადგინა პოლიტიკურმა გაერთიანებამ ,,გირჩმა – მეტი თავისუფლება“, რომელმაც სრული მოწონება დაიმსახურა ყველა ოპოზიციური ძალის მხრიდან. აღნიშნული კომპონენტის დანერგვა უზრუნველყოფს არჩევნების ხმის მიცემის პროცესის ავტომატიზაციასა და აღრიცხვას ისეთი ტექნოლოგიით, რაც გამორიცხავს ე.წ. „კარუსელების“ დატრიალებას, უბნებიდან ბიულეტენების გატანას და ბევრი სხვა ტიპის მანიპულაციას.

გარდა ამისა შევთანხმდით, რომ საწერი კალმის ნაცვლად იქნება გამოყენებული ბეჭედი ან შტამპის ტიპის საშუალება, რითაც მოხდება არჩევანის გაკეთება ბიულეტენში“, – აღნიშნავს დავით ცეკვავა.

ავტორი
ნინი ხიჯაკაძე