ვაშლიჯვრის მიმდებარე ტერიტორიაზე მეწყრული პროცესები კვლავ გააქტიურებულია. ილიას სახელმწიფო უნივერსიტეტის დედამიწის შემსწავლელ მეცნიერებათა ინსტიტუტის დირექტორ თეა გოდოლაძის განცხადებით, მეწყრის დაძვრა ამ ტერიტორიაზე მიმდინარე სამშენებლო სამუშაოებმა გამოიწვია. მკვლევარი ხაზგასმით მიუთითებს, რომ მეწყერული პროცესების შეჩერება შეუძლებელია ხელოვნური ჩარევით:
„არასწორი სამშენებლო ჩარევის შედეგად, მოიჭრა გრუნტი იქ, სადაც არ უნდა მოჭრილიყო. შედეგად, ამან გამოიწვია ფერდის არასტაბილურობა და შესაბამისად ნალექების გამო წამოვიდა გრუნტის ნაწილი.
ასევე, დაზიანებულია საბავშვო ბაღი, რომელიც ზუსტად ამ ფერდზე, ჩაჭრილი გრუნტის უკან მდებარეობს. საბავშვო ბაღის ტერიტორიაზე ბზარებია გაჩენილი.
მეწყრის შეჩერება შეუძლებელი რამ არის. ამის შესახებ ვიღაცამ უნდა უთხრას მერსაც, მის მოადგილესაც და ა.შ. ეს არის ხალხი, რომელიც ამ პროფესიაში ვერ ერკვევა, ამიტომ ასეთი განცხადებების გაკეთება არ შეიძლება.
ვაჩერებთ მეწყერს, შევაჩერეთ მეწყერი – ძალიან სულელური განცხადებაა, ძალიან დიდი ბოდიში“, – აცხადებს თეა გოდოლაძე.
