ტელეკომპანია “პირველის” ეთერში გასულ რეპორტაჟს ეხმიანება პოლიტიკური პარტია “ლელო”, გადაცემაში ხსენებულ ფაქტთან დაკავშირებით გამოძიების დაწყებას და კონკრეტული თანამდებობის პირების გადადგომას მოითხოვს. ამასთან პარტია წინააღმდეგია მოლაპარაკებების ნებისმიერ ფორმატში ირაკლი ღარიბაშვილის ჩართულობაზე:
“2021 წლის 6 მარტს ტელეკომპანია ტვ1-ის ეთერში გასული სიუჟეტი, რომელშიც გავიდა ბერა ივანიშვილის საუბრები ირაკლი ღარიბაშვილთან და ანზორ ჩუბინიძესთან, შეიცავს უმძიმესი ორგანიზებული დანაშაულის ნიშნებს.
“ლელო” მოითხოვს:
1. სიუჟეტში მოთხრობილ ფაქტებზე დაუყოვნებლივ დაიწყოს გამოძიება.
2. გამოძიებაში ჩართულ იქნენ საერთაშორისო ავტორიტეტული საგამოძიებო ინსტიტუტები.
3. გამოძიებაზე ზემოქმედების თავიდან ასაცილებლად, დაუყოვნებლივ გადადგნენ თანამდებობიდან პრემიერ მინისტრი ირაკლი ღარიბაშვილი და სახელმწიფო დაცვის სპეციალური სამსახურის უფროსი ანზორ ჩუბინიძე.
ირაკლი ღარიბაშვილთან და მისი ჩართულობით ნებისმიერ ფორმატში მონაწილეობა “ლელოსთვის” მიუღებელია,” – ნათქვამია პარტიის მიერ გავრცელებულ განცხადებაში.
