თავდასხმა ვახო სანაიაზე
ტელეკომპანია “ფორმულას” ჟურნალისტ ვახო სანაიას თავს დაესხნენ. ჟურნალისტმა კოლეგებთან დეტალურად აღწერა მომხდარი ფაქტი და ხაზი გაუსვა დამამძიმებელ გარემოებას, რაც იმაში მდგომარეობდა, რომ თავდასხმა მოხდა ოჯახის წევრებზეც და ამ დროს მათთან ერთად იმყოფებოდა მცირე წლოვანი ბავშვიც. ვახო სანაიას განცხადებით, თავდამსხმელების სამიზნე მისი ჟურნალისტური საქმიანობის გამო გახდა.
როგორც ჟურნალისტი იხსენებს, როცა მოყინულ გზაზე მანქანა დაუცურდათ და მისი ამოყვანით იყვნენ დაკავებულები, ამ დროსაც გამოჩდნენ უცნობი პირები, რომლებმაც ჯერ სიტყვიერი, სემდეგ ფიზიკური შეურაცხყოფა მიაყენეს:
,,სამი ადამიანი გამოჩნდა იქვე, იმ უბანში და დაესხა ჩვენს ოჯახს თავს. ჯერ პროვოცირებდნენ ყველანაირად, მერე დაიწყეს ასე ვთქვათ სიტყვიერი შეურაცხყოფა და შემდეგ უკვე გადავიდნენ ფიზიკურ ძალადობაზე. ერთ-ერთი მათგანი უკნიდან მომეპარა, გამოვიწიე, წაიქცა, მეც ფეხი ამისრიალდა და აი ამ წაქცეულზე მოვიდა დანარჩენი ორი და სამივე მონაწილეობდა აი ამ ფიზიკურ ძალადობაში.
ეს ადამიანები კონკრეტული თავისი პოლიტიკური პოზიციით იყვნენ იქ და უკმაყოფილებას გამოთქვამდნენ, ნუ რბილი სიტყვაა უკმაყოფილებას, ტელევიზიების მიმართ, იქ სადაც მე ვმუშაობ, სადაც ვმუშაობდი“, – განაცხადა ვახო სანაიამ.
ავტორი
ნინი ხიჯაკაძე
საინფორმაციო სააგენტო “პარალელი” გმობს ჟურნალისტ ვახო სანაიაზე თავდასხმის ფაქტს და ხელისუფლებას მოუწოდებს ქვეყანაში შექმნას ისეთი გარემო, რომ ჟურნალისტური საქმიანობა იყოს სრულად თავისუფალი და ხელშეუხებელი!
