ინფექციური საავადმყოფოს სამედიცინო დირექტორის მარინა ეზუგბაიას ინფორმაციით, მეორე ტალღა მოსალოდნელია, როდესაც დაიწყება ზამთრის პერიოდი, რასაც თან დაემატება ე.წ. გრიპის ეპიდსიტუაციაც. ეზუგბაიას განმარტებით, ამ ეტაპზე ფიქსირდება მატება, რომელიც დაკავშირებულია შიდა ტურიზმთან, თუმცა ათეული შემთხვევების მატება სამედიცინო სექტორს მძიმე ტვირთად არ დააწვება, მთავარია არ იყოს ასეულობით:
„ჩვენ არ ვამბობთ, რომ ეს მეორე ტალღაა, მეორე ტალღა გვექნება, როდესაც ზამთრის სეზონი დადგება, უშუალოდ გრიპის ეპიდსიტუაციასთან დაკავშირებით, ოქტომბრის ბოლოს და ნოემბრის შუა რიცხვებიდან, მოხდება სეზონური ინფექციების კოვიდ-19-თან თანხვედრა, ამის შემდეგ მოსალოდნელია მეორე ტალღაზე ვილაპარაკოთ. ამ ეტაპზე გვაქვს მატება, რომელიც დაკავშირებულია ჩვენ შიდა ტურიზმთან, როცა საქართველოს მოქალაქეების დიდი ნაწილი იმყოფებოდა მესტიასა და აჭარაში.
კიდევ ერთხელ ვიტყვი, რომ ათეული შემთხვევების მატება სამედიცინო სექტორს არ დააწვება ძალიან მძიმე ტვირთად და ამას სამედიცინო სექტორი, ჯანდაცვის სამინისტრო გაუმკლავდება. მთავარია შემთხვევების ზრდა ასეულობით არ დაგვეწყოს და როგორმე არსებული მონაცემების შეკავება გვჭირდება.
დღეს დაფიქსირებული 57 ახალი დადასტურებული შემთხვევის განაწილება ი ასეთი გახლავთ:
5 პაციენტის წყარო არის საკონდიტრო „დონა“; 14 პაციენტის წყარო გახლავთ ბათუმი; 18 პაციენტისა – დადასტურებულ შემთხვევებთან კონტაქტი; 4 პაციენტის წყაროა აჭარაში მოგზაურობის ისტორია; 3 შემთხვევა არის შემოტანილი, საიდანაც 2 სატვირთო ავტომობილის მძღოლია; 5 არის სამედიცინო პერსონალი შემთხვევა და 8 პაციენტზე გრძელდება ეპიდკვლევა.
57 პაციენტიდან 25 პაციენტის წყარო არის აჭარა, პირდაპირი თუ არაპირდაპირი კონტაქტებით. ბოლო ორი კვირის მონაცემებით, 27 აგვისტოდან 9 სექტემბრის ჩათვლით, 100 ათას მოსახლეზე ქვეყანაში ავადობის მაჩვენებელი გახლავთ 10.2, ხოლო აჭარაში ინციდენტობის მაჩვენებელი არის 52.9 ინციდენტობის მაჩვებელი ანუ 100 ათას მოსახლეზე ავადობის რიცხვი,“ – განაცხადა მარინა ეზუგბაიამ.
ავტორი
ნინი ხიჯაკაძე
