საქართველოს პრემიერ-მინისტრმა, გიორგი გახარიამ სამთავრობო სხდომაზე განაცხადა, რომ ქვეყნის მასშტაბით კვლავ დაფიქსირდა კორონავირუსით ინფიცირებულები, რომელთა რაოდენობამაც 20-ს მიაღწია. მთავრობის მეთაურმა ასევე აღნიშნა, რომ საქართველო აღიარებულია ერთ-ერთ წარმატებულ ქვეყანად, თუმცა მოსახლეობამ კვლავ უნდა გააგრძელოს ყველა იმ წესის დაცვა, რომელიც აუცილებელია ჯანმრთელობის შენარჩუნებისთვის:
,,გუშინ დაფიქსირდა ინფიცირებულთა რაოდენობის ზრდა, რომელმაც 38-ს მიაღწია, ხოლო დღეს 20-ს. ეს ფაქტი არის უაღრესად საყურადღებო. აღსანიშნავია, რომ გუშინ ქვეყნის მასშტაბით ჩატარდა ტესტირება, ზუსტად 7186 ადამიანზე. მონაცემებზე პასუხი გვექნება დღის მეორე ნახევარში, რაც ეპიდემოლოგიურ სურათს უკეთესად დაგვანახებს.
გლობალური პანდემია არის გამოწვევა, რომელთანაც ჩვენ მოგვიწევს ცხოვრება მომავალი წელიწადნახევარი. ამიტომ ჩვენი ძირითადი ამონაცანაა სწორად ვმართოთ რისკები. ვერავინ, მათ შორის ცალკე აღებული საქართველოც კი, ვერ დაამარცხებს პანდემიას, ვინაიდან ეს არის გლობალური სახის. ჩვენ უნდა დავიცვათ ჩვენი მოსახლეობის ჯანმრთელობა, შემდგომ კი ეკონომიკა.
ამ მიმართულებით უკვე გვაქვს გარკვეული წარმატებები. საქართველო აღიარებულია ერთ-ერთ წარმატებულ ქვეყანად ეპიდემიის რისკების მართვის მხრივ ისევე, როგორც ეკონომიკური რისკების შემსუბუქებისა. მოგეხსენებათ, ბოლო 2 კვირის განმავლპობაში ორმა საერთაშორისო სარეიტინგო ორგანიზაციამ შეუნარჩუნა საქართველოს საინვესტიციო რეიტინგი, რაც, რა თქმა უნდა, არის მიღწევა.
მოგეხსენებათ, რომ ეკონომიკის გახსნის ძალიან ფრთხილი ნაბიჯები გადავდგით, როგორც საერთაშორისო ფრენების მიმართულებით, ისე შიდა ტურიზმის მიმართულებით. ჩვენი მთავრობის გადაწყვეტილების შესაბამისად უახლოეს მომავალში სასწავლო პროცესი განახლდება საკლასო ოთახებში. სწავლა დაიწყება 15 სექტემბერს.
ეკონომიკური კრიზისის მიმართულებით მოგეხსენებათ, რომ პირველი ნაბიჯი, რომელიც ჩვენ გადავდგით ანტიკრიზისული გეგმით, ეს იყო ტურისტული სექტორის და სასტუმრო ბიზნესის დახმარება. 3 თვეში გამოჩნდა, რომ ეს არ იყო საკმარისი. შემდგომ ჩვენ ამ კომპანიებს, რომლებიც ჩართულნი არიან სასტუმრო ბიზნსეში, სესხის თანადაფინანსების პროგრამა გავუგრძელეთ 3 თვიდან 6 თვემდე. ეს ნაბიჯიც არ იქნება საკმარისი და ჩვენ ვფიქრობთ, სესხის თანადაფინანსების სუბსიდირების საპროცენტო განაკვეთის პროგრამა გავაგრძელოთ 6 დან 12 თვემდე,“ – განაცხადა გიორგი გახარიამ.
ავტორი
ნინი ხიჯაკაძე
