პოლიტიკური პლატფორმა ”სტრატეგია აღმაშენებლის” ლიდერმა, გიორგი ვაშაძემ ბრიფინგი გამართა 4 წლის წინ დაკარგული ახალგაზრდა ქალის, რუსუდან ახალბედაშვილის დედასთან, ლალი კანიაშვილთან ერთად. ოპოზიციონერი ლიდერის თქმით, გამოძიებას არ უმუშავია – არ ამოუღია სათვალთვალო კამერების ჩანაწერები, პირადი კომპიუტერი და მობილური ტელეფონი.
რუსუდანის დედა ამბობს, რომ გამოძიებას მისი დაკითხვა არ მოუთხოვია და იგი თავად წავიდა დასაკითხად:
„ჩემი შვილის ნივთები: ჩანთა, ფეხსაცმელი და ტელეფონი იყო ნაპირთან დალაგებული. მტკვარი დააშრეს, მაგრამ არაფერი არ იყო. პოლიციას არაფერი არ მოუთხოვია ჩემთვის, დასაკითხად მე თვითონ წავედი, რომ დედა ვარ, დამკითხეთ,“ – ამბობს ლალი კანიაშვილი.
კონკრეტული კითხვებით მიმართავს გიორგი ვაშაძე მთავრობის მეთაურსა და შს მინისტრს:
“მივმართავ პრემიერ-მინისტრ გახარიას, შინაგან საქმეთა მინისტრს, რა არის თქვენი ფუნქცია თუ არა, აი ეს მსგავსი საქმეების გამოძიება. გავიდა 4 წელი და აგერ ჩვენ ვსხედვართ და რამდენი კითხვა გვაქვს:
– ტელეფონდან რატომ არ ამოიღეს ზარები?
– 112-ში ვინ დარეკა?
– რატომ არ დაკითხეს ოჯახი, თუ სად იყო ეს გოგონა ბოლოს?
ამ უამრავ კითხვაზე არ არის პასუხი,” – განაცხადა გიორგი ვაშაძემ.
ინფორმაციისთვის, 24 წლის რუსუდან ახალბედაშვილი 2016 წელს გაუჩინარდა და საძიებო სამუშაოებმა დღემდე შედეგი ვერ მოიტანა.
ავტორი
თამუნა მახარაშვილი
