„ევროპული საქართველოს“ ლიდერის, დავით ბაქრაძის განცხადებით, 30-მდე ოპოზიციური პარტია ერთიანდება, რათა არჩევნების გაყალბება არ მოხდეს.
დავით ბაქრაძის განმარტებით, ეს ძალიან სერიოზული ნაბიჯია, მემორანდუმი მოქალაქეების ხმების დაცვას უზრუნველყოფს, რადგან არჩევნების შედეგები ხალხის ნებას უნდა ასახავდეს:
„30-მდე ოპოზიციური პარტია, პრაქტიკულად, სრული პოლიტიკური სპექტრი ერთმანეთის ხმების დაცვაზე და იმაზე თანხმდება, რომ ერთობლივი ძალისხმევით არ დაუშვებს არჩევნების გაყალბებას და რა თქმა უნდა, ეს არის ძალიან მძლავრი პოლიტიკური სიგნალი ოპოზიციის ერთიანობის შესახებ.
ამ დოკუმენტს აქვს პრაქტიკული ღირებულებაც და მასში ასახული იქნება ის პრაქტიკული მექანიზმები, რომლითაც ოპოზიცია ერთმანეთის ხმებს დაიცავს. ამიტომ დოკუმენტი გახლავთ პოლიტიკურადაც და პრაქტიკულადაც მნიშვნელოვანი.
ვფიქრობთ, რომ ეს იქნება ძალიან სერიოზული ნაბიჯი, რომლითაც დავიცავთ ჩვენი მოქალაქეების ხმებს და უზრუნველვყოფთ იმას, რომ არჩევნების შედეგები ასახავდეს ხალხის ნებას”,- განაცხადა დავით ბაქრაძემ.
შეგახსენებთ, რომ 30-მდე ოპოზიციურმა პარტიამ დღეს ხელი მოაწერა მემორანდუმს, რომლის მიხედვითაც ოპოზიციის წარმომადგენლები შეთანხმდნენ, რომ როგორც საკუთარ, ისე ერთმანეთის ხმებს დაიცავენ.
ავტორი
მარიკა ხორავა
