მთავრობის სხდომაზე, თბილისის მერმა კახა კალაძემ რამდენიმე მნიშვნელოვან საკითხზე გაამახვილა ყურადღება. ერთ-ერთი სიახლე, რომელზეც დედაქალაქის მერმა ისაუბრა ზონალურ-საათობრივი პარკირების სისტემაა.
თბილისის მერი მოუწოდებს საზოგადოებას, რომ სისტემაში ავტომობილები რაც შეიძლება სწრაფად დაარეგისტრირონ, რადგან პროექტი ძალაში 10 სექტემბრამდე შევა:
„ზონალურ-საათობრივი პარკირების სისტემის დანერგვის მიმართულებით, კონკრეტულ ქუჩებზე უკვე გვაქვს განხორციელებული პროექტები, რომელიც საკმაოდ წარმატებით მიმდინარეობს.
შემდეგი ეტაპი საბურთალოს რაიონში, პეკინის გამზირსა და მიმდებარე ქუჩებზე განხორციელდება. კიდევ ერთხელ მინდა ვთხოვო და მოვუწოდო მოსახლეობას, რომ იაქტიურონ, მათი კერძო ავტომობილები ჩვენს სისტემაში დაარეგისტრირონ, რათა პეკინის გამზირზე და მიმდებარე ქუჩებზე მცხოვრები ადამიანებისთვის, პარკირება უფასო იყოს.
ასევე, პარკირება უფასო იქნება შშმ პირთათვის და მათთვის, ვისაც ელექტრომობილები ჰყავს. სხვა უბნებიდან შემოსული ადამიანებისთვის პირველი 15 წუთი არის უფასო და შემდეგ, რა თქმა უნდა, იქნება გადასახადი, როგორც ეს გვქონდა წინა შემთხვევებში. ჩვენ მხოლოდ ამით არ შემოვიფარგლებით. რა თქმა უნდა, ყველა უბანში ანალოგიური მიდგომა და დამოკიდებულება გვექნება, თუმცა პარკირების საფასური რაიონების მიხედვით, განსხვავებული იქნება. ასე რომ, კიდევ ერთხელ მინდა ვთხოვო ადგილობრივ მოსახლეობას, დარეგისტრირდით, რადგან ზონალურ-საათობრივი პარკირების სისტემა 10 სექტემბრიდან უკვე ძალაში შედის.
პეკინის გამზირსა და მიმდებარე ტერიტორიაზე განთავსებულია საინფორმაციო ჯიხურები, სადაც შეგიძლიათ, მიბრძანდეთ და ჩვენი თანამშრომლები რეგისტრაციის პროცესში დაგეხმარებიან. ასევე, მოგაწვდიან სრულყოფილ ინფორმაციას, თუ როგორ ფუნქციონირებს ზონალურ-საათობრივი პარკირების სისტემა,” – განაცხადა კახი კალაძემ.
ავტორი
ეკა ქაჩლიშვილი
