„შეიგრძენი საფრთხე“ – ამ სლოგანით ქუთაისში საპროტესტო აქცია გაიმართა. თეთრ ხიდზე შეკრებილმა არასმთავრობო სექტორისა და ოპოზიციური პარტიების წარმომადგენლებმა ქუთაისში ნამოხვანჰესის მშენებლობა გააპროტესტეს. აქციის მონაწილეების თქმით, ეს ჰესი არ უნდა აშენდეს, რადგან ის იმერეთის რეგიონს საფრთხეს უქმნის.
„დღეს აქ შევიკრიბეთ სხვადასხვა პოლიტიკური და არაპოლიტიკური ორგანიზაციების წარმომადგენლები, ასევე შემოგვიერთდნენ რიგითი მოქალაქეები, რომლებიც სხვა დროს საპროტესტო აქციებში მონაწილეობას არ იღებდნენ.
დღევანდელი აქცია არა მხოლოდ ქუთაისის, არამედ, საერთოდ, ქვეყნის მომავალს ეხება, რადგან რეალურად ეკოლოგიური კატასტროფის წინაშე ვართ. ამას წინასაარჩევნო პიარისთვის არ ვამბობ, მართლა ძალიან სერიოზული საფრთხის წინაშეა ჩვენი ქალაქი.
ჩვენ ყრუ და ბრმა მთავრობა გვყავს, ამიტომ ძალიან ვთხოვ ყველას გაითვალისწინონ ის რისკები, რაც შეიძლება ამ ჰესის მშენებლობამ მოუტანოს ჩვენ რეგიონს,“ – განაცხადა “ახალი საქართველოსა” და გაერთიანებული ოპოზიცია „ძალა ერთობაშია“-ს წევრმა ზვიად ბაღდავაძემ.
აღნიშნულ საკითხთან დაკავშირებით გარემოს დაცვის სამინისტროში კომენტარის გაკეთებაზე უარი განაცხადეს.
ლიკა დევდარიანი
სააგენტო “პარალელის”
რეგიონალური კორესპონდენტი
