საქართველოს მე-3 პრეზიდენტი, სალომე ზურაბიშვილი “ქართული ქარტიის” განახლების თაობაზე საუბრობს და კონკრეტული პრიორიტეტული საკითხების დამატების წინადადებით გამოდის:
“ქართულ ქარტიას” განახლება შეიძლება სჭირდებოდეს, თუმცა ჯერ არავის წარმოუდგენია კონკრეტული წინადადება, არც არავის უკან წაუღია ხელმოწერა. რჩება ამ ეტაპზე მაინც როგორც მაკონსოლიდირებელი დოკუმენტი, სამოქმედო გეგმა, რომელმაც უნდა განსაზღვროს წინააღმდეგობის ფრონტის გამარჯვებისას პირველადი საერთო სამოქმედო გეგმა.
მე მინდა ყველა ხელმომწერს შევთავაზო ორი მნიშვნელოვანი ცვლილება თუ დამატება:
– პირველ ორ პრიორიტეტთან ერთად (სინდისის და პოლიტპატიმრების დაუყონებლივ განთავისუფლება, ყველა ანტიევროპულ და ანტიქართულ კანონის გაუქმება) მესამეც ჩაეწეროს დაუყონებლივ დუშენის დაავადებულ ბავშვების მედიკამენტები ბიუჯეტიდან დაფინანსდეს!
– და მეორე შეიქმნას სახელმწიფო სპეციალური ფონდი სადაც ჩაირიცხება კორუფციით, მანკიერი ტენდერებით და სხვა ფორმით ბიუჯეტიდან მოპარული თანხები და პრიორიტეტად ამ თანხებს განესაზღვრება საქართველოში ბავშვთა სახელმწიფო ონკოლოგიური ცენტრისა და ასევე ყველა შესაძლო ბავშთა დაავადებების სამკურნალო ხარჯების დაფინანსება.
ანუ ჩვენი მომავალი თაობის ჯანსაღ სიცოცხლეს უნდა მიეძღვნას ამდენი თაღლითის და კორუმპირებული პოლიტიკოსისგან მოპარული თანხები!
იმედი მაქვს ეს საკითხი ყველასათვის მისაღები იქნება და ერთიანობას გაამყარებს კიდევაც!” – წერს სალომე ზურაბიშვილი სოციალურ ქსელში.
