კორონავირუსის გამო შექმნილი მდგომარეობის გამო წელს პირველად ქუთაისში ყველაზე მასშტაბური და უძველესი სახალხო დღესაწაული „გვირილობა“ არ გაიმართება. ამ ფაქტთან დაკავშირებით ქუთაისის საკრებულოს თავმჯდომარის მოვალეობის შემსრულებელმა ირაკლი შენგელიამ 1 მაისს სოციალური ქსელით მიმართვა გაავრცელა:
„ხვალ ორმაისობაა, ეს დღე საწყისს გვირილობის საქველმოქმედო აქციიდან იღებს. 1912 წელს ჩვენი თანაქალაქელები ტუბერკულიოზით დაავადებულების დასახმარებლად გაერთიანდნენ. ქველმოქმედების და სამოქალაქო პასუხისმგებლობის ეს მაგალითი საუკუნეების განმავლობაში იქცა ტრადიციად და ჩვენი ქალაქის იდენტობის ერთ-ერთ განმსაზღვრელად.
ქალაქის სიყვარულს სწორედ ეს დამოკიდებულებები ქმნის. დღეს, როცა ჩვენი ქვეყანა და ქალაქი დგას კორონავირუსის უდიდესი გამოწვევის წინაშე, თანადგომა, ერთმანეთის გამხნევება და გაძლიერება განსაკუთრებულ მნიშვნელობას იძენს.
ორმაისობის ისტორია არ დასრულებულა, ეს ისტორია იწერება დღესაც და ჩვენ ვხედავთ ადამიანებს, რომლებიც უანგაროდ ეხმარებიან და აძლიერებენ გვერდით მყოფებს, ადამიანებს, რომლებიც იცავენ სხვათა უსაფრთხოებას, ადამიანებს, რომელთა მაღალი სამოქალაქო პასუხისმგებლობის შედეგად, დაავადებას მნიშვნელოვანი ადამიანური დანაკარგების გარეშე ვუმკლავდებით. ეს თითოეული მოქალაქის დამსახურებაა.
მართალია, შექმნილი ვითარებიდან გამომდინარე, ამ დღის აღსანიშნავი ყველა საზეიმო ღონისძება გაუქმდა, თუმცა ეს არ გვართმევს შესაძლებლობას დავეხმაროთ მათ, ვისაც სჭრდება და გავამხნევოთ ერთმანეთი.
ხვალ მთელი დღის განმავლობაში ჩემი გვერდი ღიაა თქვენი მილოცვების და მოწოდებებისთვის, მიმართეთ ჩვენს თანაქალაქელებს. ერთად გავიზიაროთ ჩვენი ქალაქის სიყვარული,“ – წერს ირაკლი შენგელია.
ლიკა დევდარიანი
სააგენტო “პარალელის”
რეგიონალური კორესპონდენტი
