თბილისი, 21 ივნისი, 2026 წელი (12:00 – 17:00 სთ) – მთაწმინდის პარკში, 21 ივნისს, ,,გაერთიანება ქართული ხორბლის“ ორგანიზებით ფესტივალი „ოქროს თავთავი“ გაიმართება.
ღონისძიება 12:00 საათზე გაიხსნება და მისი მიზანია ხორბლის ადგილობრივი ჯიშების მოთხოვნის გაზრდა, ბაზრის ფორმირების ხელშეწყობა, პურ-ღვინისა და ხორბალთან დაკავშირებული მრავალფეროვანი გასტრო-კულტურის ტრადიციის გაცოცხლება.
ამასთანავე, იგი ხელს შეუწყობს მწარმოებლებისა და მომხმარებლების პირდაპირი ეკონომიკური კავშირების დამყარებას, დარგის ექსპერტთა და ახალგაზრდა თაობის დაკავშირებას და საზოგადოებაში აგრობიომრავალფეროვნების მნიშვნელობის შესახებ ცნობიერების ამაღლებას.
ფესტივალის ფარგლებში მოწყობილ საგამოფენო სივრცეში საქართველოს სხვადასხვა რეგიონიდან წარმოდგენილი იქნება ტრადიციული პურეული, სპეციალურად ამ დღისთვის შერჩეული ნატურალური ღვინოები და ყველი. პარალელურად, საინფორმაციო-შემეცნებით პავილიონში ვიზიტორებს შესაძლებლობა ექნებათ დაათვალიერონ ქართული მარცვლეულის კოლექცია, გაეცნონ თემატურ სამეცნიერო-პოპულარულ მასალებს და კონსულტაციები გაიარონ დარგის წამყვან სპეციალისტებთან. სადღესასწაულო განწყობას კიდევ უფრო გაამრავალფეროვნებს ხალხური რეწვის ნიმუშების პრეზენტაცია, ეთნომუსიკალური ნომრები და გასართობი პროგრამა.
ინფორმაციას საქართველოს ფერმერთა ასოციაცია ავრცელებს
