უნამუსობად მიაჩნია სოციალური აგენტებისთვის მხოლოდ 80 ლარის ჩარიცხვა, ხოლო დაზღვევის მქონე აგენტებისთვის 50 ლარის ჩარიცხვა “ახალი საქართველოს” სოციალური მიმართულების ხელმძღვანელს თეონა ჭალიძეს და მოითხოვს, რომ აპრილის თვის ხელფასი, წინა სამი თვის ხელფასის საშუალოს მიხედვით აუნაზღაურდეთ და მომდევნო თვეებში მათი გაორმაგებული შრომა შესაბამისად იქნას დაფასებული. ამასთან მიაჩნია, რომ სოციალური აგენტები, ჯანდაცვის სამინისტრომ და სოციალური მომსახურების სააგენტომ აუცილებლად უნდა უზრუნველყონ ტრანსპორტირებით, ასევე სრულად აღჭურვონ საჭირო ინვენტარით, ვირუსისაგან დასაცავად, რადგან ისინი ვერ ახორციელებდნენ თავიანთ საქმიანობას, არიან რისკის ქვეშ და ათასობით ოჯახის არსებობა სოციალური აგენტების ვიზიტზეა დამოკიდებული:
“სოციალურ აგენტებს 80 ლარი ჩაერიცხათ ხელფასი, ხოლო ვისაც დაზღვევაც ჰქონდა მხოლოდ 50 ლარი მიიღეს. დიახ, არ გეჩვენებათ, იმ ადამიანებს, ვინც ახლა წელში უნდა გაწყდეს, რომ ასობით და ათასობით ოჯახის სოციალური მდგომარეობა აღწეროს, რათა მათ მთავრობის სოციალური დახმარება მიიღონ ან საარსებო შემწეობა ჩაერიცხოთ.
თვითონ სოციალური აგენტები დაჩაგრა დღეს ჯანდაცვის სამინისტრომ და სოციალური მომსახურების სააგენტომ. ესაა უნამუსობა და დანაშაული. მაშინ როცა არ მოძრაობდა საზოგადოებრივი ტრანსპორტი ლოგიკურია, რომ სოციალური აგენტები თავიანთ საქმიანობას ვერ განახორციელებდნენ. მათ ტრანსპორტირებაზე არ უზრუნია სოციალური მომსახურების სააგენტოს. გიორგი წოწკოლაურს ასევე არ უზრუნია სოციალური აგენტების უსაფრთხოებაზე და მათ სათანადო აღჭურვაზე ვირუსისგან თავის დასაცავად.
მაშინ როცა სოციალურ აგენტებს უწევთ ბევრ ოჯახში, ბევრ ადამიანთან კომუნიკაცია. მოვითხოვ აპრილის თვის ხელფასი აუნაზღაურდეთ წინა სამი თვის ხელფასის საშუალოს მიხედვით და მომდევნო თვეებში მათი გაორმაგებული შრომა პრემიებით იქნეს დაფასებული. ასევე სრულად იყვნენ უზრუნველყოფილი საჭირო ინვენტარით და მათი ტრანსპორტირების საკითხი გადაიჭრას სასწრაფოდ, რადგან ათასობით ოჯახი არის სოციალური აგენტების მოლოდინში, სწორედ მათ ვიზიტზეა დამოკიდებული ამ ოჯახების არსებობა,” – აცხადებს თეონა ჭალიძე.
ავტორი
თამთა ასლანიშვილი
