“ჩვენმა პარტიამ, “ქართულმა ოცნებამ” საშუალება მისცა საზოგადოებას, თავისუფალი არჩევანი გააკეთოს” – ბიძინა ივანიშვილმა

არჩევნებში ხმის მიცემის შემდეგ მედიასთან კომენტარი გააკეთა “ქართული ოცნების” საპატიო თავმჯდომარემ, ბიძინა ივანიშვილმა:

“დღეს კიდევ ერთი მნიშვნელოვანი დღეა ჩვენი ქვეყნის ისტორიაში. თავისუფალი არჩევნები უკანასკნელ პერიოდში განუხრელად მიმდინარეობს საქართველოში, დღესაც ერთ-ერთი საინტერესო და ძალიან მნიშვნელოვანი არჩევნებია.

ჩვენმა პარტიამ, “ქართულმა ოცნებამ” საშუალება მისცა საზოგადოებას, თავისუფალი არჩევანი გააკეთოს, ისევე, როგორც ბოლო წლებში თავისუფალი სიტყვის, თავისუფალი ბიზნესის და თავისუფალი ცხოვრების დაფუძნება მოვახერხეთ.

13 წელიწადია მოგეხსენებათ, რაც “ქართული ოცნება” ხელისუფლებაშია, ჩვენ ყველა მიმართულებით შთამბეჭდავ წარმატებებს მივაღწიეთ, საზოგადოებასთან ერთად, მაგრამ ყველაზე დიდი წარმატება, ყველაზე დიდი მიღწევა, რასაც შეიძლება ხაზი გავუსვათ გახლავთ ის, რომ “ქართული ოცნების” წევრებმა, ისევე საზოგადოებამ მოახერხა და ისწავლა ობიექტური ანალიზის გაკეთება, კრიტიკული აზროვნების განვითარება.

როგორი განცხადებებიც არ უნდა გაკეთდეს დღეს ჩვენი ოპონენტებისგან, თუ ის არ იქნება ობიექტური, ქართული საზოგადოება მასზე რეაქციას არ აკეთებს. მოსახლეობამ ისწავლა თეთრის შავისგან გარჩევა, სწორი არჩევანის გაკეთება.

იმედია, დღეს საზოგადოება იქნება აქტიური, მაქსიმალურად მობილიზებულად მივლენ საარჩევნო ყუთებთან და სწორ არჩევანს გააკეთებენ“, – განაცხადა ბიძინას ივანიშვილმა.