ჟურნალისტი ვახო სანაია, “ქართული ოცნების” საპატიო თავმჯდომარე ბიძინა ივანიშვილთან მიმართებაში, კონკრეტულ გეოპოლიტიკურ საკითხებს განიხილავს და მძიმე რეალობაზე საუბრობს:
“ყველა სახელმწიფო უნდა ზრუნავდეს საკუთარი თავდაცვისა და უსაფრთხოების გაძლიერებაზე. ივანიშვილი პირიქით მოქმედებს.
ყველა სახელმწიფო უნდა ზრუნავდეს ძლიერი მეგობრების შეძენაზე. ივანიშვილი პირიქით იქცევა.
ყველა სახელმწიფო უნდა ზრუნავდეს ცივილიზებული სამყაროს ნაწილი გახდეს გადარჩენის მიზნითაც. ივანიშვილი პირიქით მოძრაობს.
ყველა სახელმწიფოს ხელს უნდა აძლევდეს მტრის დასუსტება. ივანიშვილის რეჟიმი გულშემატკივრობს და ეხმარება კიდეც მტერს.
იმედია, ამ ოთხ ფაქტს ყველა იზიარებს. საკამათო არაფერია.
მოდი ახლა მივყვეთ იმ ლოგიკას, რომელსაც ივანიშვილი ხალხს ახვევს თავს. ის გვეუბნება, რომ ოთხივე უნდა უარვყოთ და გადავრჩებით. ამას ზედ უმატებს კიდევ ერთს – მე ვარ მშვიდობის გარანტი. სანამ მე ვარ, ომი არ იქნება.
თავი დავანებოთ იმას, რომ ეს სრული სისულელეა. ვინც რუსეთთან ეს გზა აირჩია, ყველამ საპირისპირო შედეგი მიიღო.
მაგრამ კარგი – ვთქვათ, ამ სიგიჟესაც დავუჯერეთ. ალბათ იმაშიც ყველანი ვთანხმდებით, რომ ივანიშვილის ძალაუფლება მარადიული არ არის. ბოლოს და ბოლოს, მოკვდავია.
ერთი სიტყვით, დადგა რეალობა, როცა მშვიდობის ,,გარანტი” ივანიშვილი აღარაა, რადგან არც ძალაუფლება და არც სიცოცხლე არაა მარადიული. რა მდგომარეობაში აღმოჩნდებით – უსაფრთხოება არ გვექნება, მეგობრები არ გვეყოლება, არც ერთი ძლიერი გაერთიანების ნაწილი არ ვიქნებით.
რჩები სრულიად მარტო და აბსოლუტურად დაუცველი შენი დაუძინებელი მტრის წინაშე.
მერე რა ხდება?
გიწევს ომი – შენ და შენს შვილებს. ან დანებება და მონობაში ცხოვრება, სადაც რუსის ჩექმა მოგხვდება ყოველდღიურად თავში შენც და შენს შვილებსაც.
შესაბამისად, ივანიშვილი გიტოვებს ომს ან მონობას. ან ორივეს ერთად.
ივანიშვილია ომის პარტია.
ეს უნდა გაიაზროს ყველამ. შენს თავს და შენს შვილებს წირავ ომისთვის ან მონობისთვის ან ორივესთვის ერთად.
მისივე ფსევდოლოგიკითაც კი ასე გამოდის.
ერთადერთი გზა ამ კაცის მოშორებაა“, – წერს ვახო სანაია ფეისბუქის პირად გვერდზე.
