“ეს არის ქვეყნის ბიუჯეტის ძარცვა და პატიოსანი კონკურენციის წესების იგნორირება, როდესაც ივანიშვილის კომპანიები უპირატეს მდგომარეობაში აღმოჩნდებიან სხვებთან შედარებით” – რომან გოცირიძე

პარლამენტის ყოფილი წევრი, რომან გოცირიძე სოციალურ ქსელში გამოქვეყნებულ პოსტში მწვავე კრიტიკულ შეფასებას აძლევს ე.წ. “ოფშორების” კანონს და კონკრეტულ განმარტებებს აკეთებს:

“ოფშორების კანონი იმაზე მავნებლურია, ვიდრე ერთი შეხედვით ჩანს. თითქოს ელემენტარული რაღაცაა-ოფშორებიდან ვიღაცას უძრავი ქონება საქართველოში “გადმოაქვს”. სინამდვილეში ეს აქტივები ფიზიკურად დიდი ხანია, რაც აქ არის. ეს არის ბიძინა ივანიშვილის კუთვნილი მიწები, სასტუმროები, სავაჭრო ცენტრები, საწარმოები, ბანკი და ა.შ. ყველაფერი ოფშორული კომპანიის საკუთრება იყო. დღემდე აქ ქონების გადასახადს მაინც იხდიდნენ.

ამ კანონით, ოფშორიდან ქაღალდზე აქ გადმოწერილი ეს კომპანიები 2030 წლამდე გათავისუფლებული არიან ქონების გადასახადისაგან. გადმოფორმებისას თავისუფლდებიან იმპორტის გადასახადისაგან, აგრეთვე საშემოსავლო და მოგების გადასახადისაგან.

ეს არის ქვეყნის ბიუჯეტის ძარცვა და პატიოსანი კონკურენციის წესების იგნორირება, როდესაც ივანიშვილის კომპანიები უპირატეს მდგომარეობაში აღმოჩნდებიან სხვებთან შედარებით“, – წერს ფეისბუქის პირად გვერდზე რომან გოცირიძე.