რიყე-ნარიყალას საბაგირო გზა დროებით წყვეტს მუშაობას, ჩერდება მიკროავტობუსების მომსახურება – ოფიციალური განცხადებები

11

თბილისის მერმა კახა კალაძემ დღეს კორონა ვირუსის გავრცელების პრევენციისთვის რამდენიმე განცხადება გააკეთა და აღნიშნა, რომ საკოორდინაციო საბჭოს გადაწყვეტილებით მთელი საქართველოს მასშტაბით, მათ შორის თბილისში, დროებით ჩერდება მიკროავტობუსების მომსახურება. თბილისის სატრანსპორტო კომპანია კი ავრცელებს ინფორმაციას რიყე-ნარიყალას საბაგირო გზის მომსახურების დროებით შეწყვეტასთან დაკავშირებით:

ვირუსის გავრცელების პრევენციისა და მგზავრთა უსაფრთხოდ გადაადგილების მიზნით, 18 მარტიდან, რიყე-ნარიყალას საბაგირო გზა დროებით წყვეტს მუშაობას და მგზავრებს შემდგომ მითითებამდე ვერ მოემსახურება.

აღნიშნული გადაწყვეტილება მთავრობის საკოორდინაციო საბჭოს რეკომენდაციებს ეფუძნება, რომლის მიზანიც ვირუსის გავრცელების რისკების მაქსიმალურად შემცირებაა,“ – აღნიშნულია თბილისის სატრანსპორტო კომპანიის ოფიციალურ განცხადებაში.

მიკროავტობუსების მომსახურების შეჩერებასთან დაკავშირებით თბილისის მერმა კახა კალაძემ აღნიშნა, რომ მიმდინარეობს მოლაპარაკებები „თბილისის მიკროავტობუსების“ მენეჯმენტთან, რომ მძღოლები არ დარჩნენ მინიმალური ანაზღაურების გარეშე:

ამ ეტაპზე, მიმდინარეობს მოლაპარაკება “თბილისის მიკროავტობუსის” მენეჯმენტთან, რათა მათ მოახერხონ, რომ მიკროავტობუსების მძღოლები არ დარჩნენ თავისი მინიმალური შემოსავალის გარეშე.

რაც შეეხება მუნიციპალურ ტრანსპორტს, საზოგადოებამ იცის, რომ ყოველდღიურად ხდება თბილისის მეტროს და ავტობუსების დეზინფექცია და მაქსიმალურად არის დაცული ჰიგიენური ნორმები.

ასევე, ხვალიდან თბილისის ავტობუსებში შეიცვლება გარკვეული მომსახურების წესები. მოხდება მძღოლის სივრცის იზოლირება ავტობუსის დანარჩენი ნაწილისგან და უსაფრთხოების დისტანციის დაცვა. მოქალაქეები ისარგებლებენ ავტობუსის მხოლოდ უკანა კარებით და მძღოლთან უშუალო შეხებაში აღარ იქნებიან“, – განაცხადა კახა კალაძემ.

ავტორი
თამთა ასლანიშვილი

კომენტარები