ანალიტიკოსი, ჟურნალისტი არჩილ გამზარდია 2024 წლის საპარლამენტო არჩევნების შედეგის არალეგიტიმურობაზე საუბრობს სოციალურ ქსელში გამოქვეყნებულ პოსტში:
“2024 წლის არჩევნებში დაირღვა ყველაზე მთავარი პრინციპი – არჩევანის ფარულობა, შესაბამისად, ნებისმიერი შედეგი არალეგიტიმურია, არც მმართველი პარტიაა გამარჯვებული და არც ოპოზიცია. ოპოზიციისთვის სასურველი შედეგიც რომ გაეფორმებინა ცესკოს, ფარულობის დარღვევის გამო მაინც არალეგიტიმური იქნებოდა.
არჩევნები განმეორებით უნდა დაინიშნოს არა იმიტომ, რომ ტოტალურად გაყალბდა ან ისე რა გაყალბდა ან სულაც არ გაყალბდა, არამედ იმიტომ რომ ყველაზე მთავარი პრინციპი დაირღვა.
რადგან არჩევნები არალეგიტიმურია, არალეგიტიმური იქნება როგორც ამჟამინდელი ხელისუფლების დამტკიცებული პარლამენტი და მთავრობა, ისევე შესაძლო ალტერნატიული მთავრობა ოპოზიციისგან.
ამ ეტაპზე პოლიტიკური ლეგიტიმაცია არ ექნება არანაირ შედეგს და ცესკოს მაჩვენებელზე აგებულ არცერთი პოლიტიკური ჯგუფის სახელისუფლებო მოდიფიკაციას.
მთელი ამ ქაოსით ქვეყანა უკან მიდის და რაც უფრო დროულად ჩატარდება არჩევნები, რომელსაც არ ექნება ამგვარი საკვანძო ხვრელები, მით უფრო დროულად გადავალთ განვითარების შემდეგ საფეხურზე“, – წერს ფეისბუქის პირად გვერდზე არჩილ გამზარდია.
