“ივანიშვილმა საქართველოს უმძიმესი დარტყმები მიაყენა. გადადგა ნაბიჯები მისი სამართლებრივად დაშლისკენ, შეცვალა ქვეყნის საგარეო კურსი, მოარღვია საქართველოს უსაფრთხოება” – ვახო სანაია

ჟურნალისტი ვახო სანაია რუსეთის საგარეო საქმეთა მინისტრის სერგეი ლავროვის განცხადებას ეხმაურება და “ქართული ოცნების” დამფუძნებელს, პარტიის საპატიო თავმჯდომარეს, ბიძინა ივანიშვილს მზიმე ბრალდებებს უყენებს:

“[სერგეი ლავროვმა] ბიძინას ზღაპრებს დიდი წერტილი დაუსვა. იმის უფლებასაც კი არ აძლევენ, რომ პროპაგანდისტულად გამოიყენოს ეს თემა. არა და მორჩა – შენ ის გააკეთე, რაც დავალებული გაქვს. ასეთია რუსების პასუხი.

რუსები არასდროს უთანხმდებიან მათ, ვინც დაუჩოქებს. რუსები ასეთებს მხოლოდ ბრძანებებს აძლევენ. ბიძინა ასეთია – მუხლებზე დააყენეს.

და თუ ვინმეს უთანხმდებიან რუსები, მხოლოდ მაშინ, როცა ძალა არ ჰყოფნით და მერე მაინც არღვევენ ყველა შეთანხმებას.

რუსეთის ინტერესებში არ შედის დამოუკიდებელი საქართველო.

საქართველოს გაერთიანების ერთადერთი გზა საქართველოს განვითარებაშია, განვითარება კი – მხოლოდ ჩვენი ქვეყნის დასავლურ ინტეგრაციაში.

ივანიშვილმა საქართველოს უმძიმესი დარტყმები მიაყენა. გადადგა ნაბიჯები მისი სამართლებრივად დაშლისკენ, შეცვალა ქვეყნის საგარეო კურსი, მოარღვია საქართველოს უსაფრთხოება, სრულიად მარტო და დაუცველს ტოვებს რუსეთის წინაშე. იმიტომ, რომ ბიძინა არის რუსი, ბიძინა არის ომის პარტია და ასრულებს მტრის დავალებებს.

26 ოქტომბერს ეს ყველაფერი უნდა დავასრულოთ“, – წერს ფეისბუქის პირად გვერდზე ვახო სანაია.

ინფორმაციისთვის: რუსეთის საგარეო საქმეთა მინისტრმა, სერგეი ლავროვმა, ბიძინა ივანიშვილის ინიციატივა/გეგმებთან დაკავშირებით, საქართველოს ოკუპირებულ ტერიტორიებთან მიმართებაში, აცხადებს, რომ “2008 წლის გადაწყვეტილებები გადახედვას არ ექვემდებარება“.