პარლამენტის თავმჯდომარის არჩილ თალაკვაძის განცხადებას ეხმიანება „ახალი საქართველოს“ თავმჯდომარე, გაერთიანებული ოპოზიციის ერთ-ერთი ლიდერი გიორგი ვაშაძე. მისი თქმით „ქართული ოცნების“ ერთადერთი მიზანი ოპოზიციის დაშლაა, თუმცა ეს მათ არ გამოუვათ:
„ქართული ოცნების“ ერთადერთი მიზანი არის ოპოზიციის ერთიანობის დარღვევა, მაგრამ ეს არ გამოსდით. ათასნაირ ფორმულირებას იგონებენ, მაგრამ ეს კოვზი უკვე ნაცარშია ჩაგდებული, რადგან ბევრჯერ გააკეთეს ერთი და იგივე.
თუ 0 %-იანია ოპოზიცია, თუ არანაირი ძალა არ გვაქვს, მაშინ რატომ გეშინიათ პროპორციული არჩევნების?! დანიშნეთ პროპორციული არჩევნები და თქვენ თუ ამხელა მხარდაჭერა გაქვთ მოიგებთ არჩევნებს.
მაგრამ სწორედ იმიტომ, რომ თქვენი ყოველდღიური აქტივობა და კამპანია გაკლებთ საზოგადოების მხარდაჭერას. ყველანაირად ცდილობთ მაქინაციების ჩატარებას, ციფრების თამაშში გინდათ ხალხი შეიყვანოთ. ახლა იქამდე მიხვედით თურმე “ამერიკის ხმამ” არ იცის ინგლისური და მარტო თქვენ იცით, სადამდე უნდა დაეცეთ?
ჩვენ ისედაც ვიცოდით, რომ ამ განცხადებებს გააკეთებდით. აბსოლუტურად მწყობრად, ჩვენი სტრატეგიის მიხედვით, გეგმაზომიერად ვიმოქმედებთ. საერთო ოპოზიციური თანამშრომლობის ფორმატს თქვენ ვერ დაშლით.
სწორედ, ამიტომ გუშინ ოპოზიციის შეხვედრა გვქონდა და ამ შეხვედრაზე ჩვენ ყველა ოპოზიციური პარტია შევთანხმდით, რომ თანამშრომლობას სხვადასხვა საკითხებთან მიმართებაში, არა მარტო საარჩევნო სისტემაზე აქვს გადამწყვეტი მნიშვნელობა.
უახლოეს მომავალში ჩვენ სასამართლო რეფორმასთან დაკავშირებით მოვაწერთ თანამშრომლობის დოკუმენტს ხელს, იმიტომ, რომ სახელმწიფოზე ვფიქრობთ, ქვეყნის განვითარებაზე ვფიქრობთ, თქვენ კი სკამებზე ფიქრობთ. არჩილ თალაკვაძის ერთადერთი საფიქრალი ახლა არის ის, ისევ იქნება თუ არა პარლამენტის თავმჯდომარე ოქტომბრის შემდეგ. მე პირობას ვაძლევ, რომ თალაკვაძე პარლამენტის თავმჯდომარე არ იქნება. მოუწევთ მათ ოპოზიციაში გადასვლა, ნუ გეშინიათ ოპოზიციაში, რომ იქნებით თქვენგან განსხვავებით ჩვენ პოლიტიკურ დევნას არ დავიწყებთ.
სჯობს ადეკვატურად უპასუხოთ ჩვენი ამერიკელი მეგობრების განცხადებებს და რაც მთავარია ადეკვატურად უპასუხეთ საზოგადოებას. ხალხს, რომელიც დაიღალა ასეთი უსუსური ხელისუფლების ყურებით,“ – განაცხადა „ახალი საქართველოს“ თავმჯდომარემ გიორგი ვაშაძემ.
ავტორი
თამთა ასლანიშვილი
