,,ერთიანი ნაციონალური მოძრაობის’’ ეროვნული კომიტეტის თავმჯდომარე, კობა ნაყოფია გამართულ ბრიფინგზე ინფორმაციას ავრცელებს ხატია დეკანოიძის პარტიაში დაბრუნებისა და მისი თანამდებობის შესახებ:
,,დღეს ,,ერთიანობა – ნაციონალური მოძრაობის’’ რიგებში ბრუნდება ხატია დეკანოიძე, რაც ძალიან მისასალმებელია. ხატია დეკანოიძე დღეიდან შეუდგება საქმიანობას, მიხეილ სააკაშვილის მიერ ინიცირებული ეროვნული კომიტეტის, თავმჯდომარის მოადგილის პოზიციაზე.
ალბათ თქვენ გახსოვთ, რომ რამდენიმე დღის წინ, მე ,,ერთიანი ნაციონალური მოძრაობის’’ ყრილობამ ამირჩია ეროვნული კომიტეტის თავმჯდომარედ, დღეიდან ხატია იქნება ეროვნული კომიტეტის თავმჯდომარის მოადგილე.
ძალიან მნიშვნელოვანია, რომ ისეთი ადამიანები, როგორიც არის ხატია დეკანოიძე, ისევ იქნებიან ,,ნაციონალური მოძრაობის’’ რიგებში, იქნებიან ამ დიდი ერთობის რიგებში. კარგი დასაწყისია და დარწმუნებული ვარ, რომ ბევრი საინტერესო, ძალიან სერიოზული ადამიანი, ბევრი სხვადასხვანაირი ადამიანი შემოუერთდება ამ დიდ ბრძოლას, ეს ძალიან მნიშვნელოვანია და ზუსტად ვიცი, რომ 26 ოქტომბერს ,,ქართული ოცნება’’ გადავა ოპოზიციაში და დღევანდელი ოპოზიციური ძალები, დიდი ერთობით, უმრავლესობას შექმნიან საქართველოს პარლამენტში. ეს არის გარდაუვალი!
მე მქონდა პირადად კონსულტაციები ამ საკითხთან დაკავშირებით მიხეილ სააკაშვილთან, მას მინდა პირველ რიგში მადლობა გადავუხადო, მას ძალიან კარგად ესმის და ზოგადად ის არის ამ ერთიანობის სულისჩამდგმელი და ის, მუდმივად, ყველაფრისთვის მზად არის ოღონდ ბევრი ერთნაირად მოაზროვნე ადამიანები, ჩვენი ქვეყნის პატრიოტები გაერთიანდნენ, რადგან დღეს ჩვენი ქვეყანა უმძიმეს ვითარებაში იმყოფება. ან ჩვენ თავს ამოვყოფთ რუსეთის ფედერაციაში ან გამარჯვების შემთხვევაში საქართველო დაიბრუნებს იმ დიდ შანს, რაც მას გააჩნია და მის ისტორიულ არჩევანს – ევროპას.
არჩევანი ჩვენი მოსახლეობისთვის იქნება ძალიან მარტივი, მე აბსოლუტურად ვარ დარწმუნებული ჩვენს გამარჯვებაში და ხატია დეკანოიძისნაირი ადამიანები ამ გამარჯვების მოახლოებას კიდევ უფრო გააძლიერებენ ოპოზიციურ ფლანგზე. დარწმუნებული ვარ, რომ ეს დასაწყისია და კიდევ ბევრი საინტერესო ადამიანი შემოგვიერთდება’’, – განაცხადა კობა ნაყოფიამ.
ავტორი
მარიამ ხაჩირაშვილი
