პარლამენტის რეგიონული პოლიტიკისა და თვითმმართველობის კომიტეტის თავმჯდომარის პირველი მოადგილე, ირაკლი ზარქუა NDI-სა და ოპოზიციის წარმომადგენლების წნორში შეხვედრას ეხმაურება და აცხადებს, რომ სადამკვირვებლო მისიების წარმომადგენლები ოპოზიციურ პარტიებს წინასაარჩევნოდ აფინანსებენ.
“ძალიან ვწუხვარ, რომ უკვე ცალსახად, ნათლად ჩანს, როგორ არის ჩართული NDI და IRI წინასაარჩევნო პოლიტიკურ კამპანიაში. რადიკალებს უკვე უფინანსებს მოსახლეობასთან შეხვედრებს, რომ დეზინფორმაცია ავრცელონ.
შემდეგ ეს ორგანიზაციები დამკვირვებლის სტატუსით იქნებიან წინასაარჩევნო გარემოს შემუშავებაში და შემდეგ დასკვნები უნდა დადონ.
როდესაც მხარე ხარ, რადიკალების, “ნაცების”, უსამშობლოების გაერთიანებებს აფინანსებ წინასაარჩევნოდ, შემდეგ შენი დასკვნა რანაირად იქნება ობიექტური?!
მიუღებელია ბატონებო, ეს არაფერში არ წერია. თქვენ გაქვთ მანდატი, რომ დააკვირდეთ და პოლიტიკურ საქმიანობაში არ იყოთ ჩართული, მაგრამ ყველაფერს აკეთებთ, რომ საქართველოს კონსტიტუცია დაარღვიოთ“, – განაცხადა ირაკლი ზარქუამ.
