მთავრობის სხდომაზე პრემიერ-მინისტრმა გიორგი გახარიამ რამდენიმე მნიშვნელოვანი საკითხი განიხილა, მათ შორის დაცული ტერიტორიების გაზრდის შესახებ განაცხადა. მთავრობის მეთაურმა ასევე აღნიშნა, რომ აპირებენ სასაზღვრო ზონასთან ურუშეთის ეროვნული პარკის შექმნას, რაც წითელი წიგნის ნუსხის სახეობების შენარჩუნებას შეუწყობს ხელს.
„დღეს მივიღებთ მნიშვნელოვან გადაწყვეტილებას, რომელიც ეხება დაცული ტერიტორიების გაფართოებას.
მოგეხსენებათ 2019 წელს დაცული ტერიტორიების საერთო მოცულობა დაახლოებით 10 პროცენტით გაიზარდა და დღეს ის შეადგენს ქვეყანაში საქართველოს ტერიტორიის 9,6 პროცენტს, თუმცა ეს არ არის მაქსიმალური მაჩვენებელი და გარემოს დაცვის და სოფლის მეურნეობის სამინისტრო გეგმავს 2020 წელს 100 000 კვმ-ით კიდევ გაზარდოს დაცული ტერიტორიების რაოდენობა.
დღეს ჩვენ მივიღებთ გადაწყვეტილებას ურუშეთის ეროვნული პარკის შექმნის შესახებ, რომელიც გახლავთ სასაზღვრო ზონაში, იგი უაღრესად მნიშვნელოვანი იქნება ტრანსსასაზღვრო თანამშრომლობისათვის და აგრეთვე წითელი წიგნის ნუსხის სახეობების შენარჩუნებისათვის.
ამ გადაწყვეტილებით ჩვენ ვქმნით მნიშვნელოვან არეალს, სადაც ხელს შევუწყობთ გარემოს დაცვას,“ – აღნიშნა გიორგი გახარიამ.
პრემიერმა ასევე ყურადღება გაამახვილა ბორჯომ-ხარაგაულის ტყე-პარკზე. მისი განცხადებით ეს ტერიტორიაც გაიზრდება 4 000 კვმ-ით, რაც სხვადასხვა სახეობებს გადაადგილების შესაძლებლობას მისცემს.
„ხდება ბორჯომი-ხარაგაულის დაცული ტერიტორიის გაფართოება 4 000 ჰექტარით, რაც ნიშნავს იმას, რომ ეს უნიკალური ტერიტორია, რომელიც ჩვენ საქართველოში გვაქვს, კიდევ უფრო ეფექტურად შეძლებს სახეობების შენარჩუნებას. კონკრეტულად, საუბარია დერეფნების შექმნისთვის კავკასიური ირმის, კეთილშობილი ირმის და არჩვისთვის მცირე კავკასიონის დასავლეთის ქედებისკენ კორიდორის შექმნაზე. ეს უაღრესად მნიშვნელოვანია წითელი წიგნის ნუსხის ცხოველების გადასარჩენად,“ – განაცხადა გიორგი გახარიამ.
ავტორი
თამთა ასლანიშვილი