“ერთიან ნაციონაციონალურ მოძრაობაში” ცვლილებებია – პარტიის თავმჯდომარის პოსტი დატოვა ლევან ხაბეიშვილმა, ახალი თავმჯდომარის კანდიდატად კი წარდგენილია თინა ბოკუჩავა. აღნიშნულთან დაკავშირებით თავისი პოზიცია დააფიქსირა საქართველოს მე-3 პრეზიდენტმა, მიხეილ სააკაშვილმა:
“მივესალმები ლევანის გადაწყვეტილებას, რომ მიხედოს საკუთარ ჯანმრთელობას, რომელიც მას შეერყა პოლიტიკურად მოტივირებული ფიზიკური ანგარიშსწორების შედეგად და ენმ-ის თავმჯდომარის პოზიციიდან გადაინაცვლოს პარტიის პოლიტსაბჭოს თავმჯდომარის პოზიციაზე.
უმნიშვნელოვანესია, რომ ლევანმა სწრაფად მოახერხოს რეაბილიტაციის გავლა და მისებურად აქტიურად ჩაერთოს გადამწყვეტ ბრძოლაში.
მხარს ვუჭერ თინა ბოკუჩავას ახალ თავმჯდომარედ არჩევას და პარტიის განახლებისაკენ გადადგმულ ნაბიჯებს.
ჩვენ ყველაფერი უნდა გავაკეთოთ მაქსიმალურად ყველა პოლიტიკური ძალის გასაერთიანებლად. ამოვიდეთ იქიდან, რომ დღეს ასეთია ხალხის და განსაკუთრებით ახალგაზრდობის დაკვეთა. ენმ გადაეწყობა მთლიანად ამ მიმართულებით ახალი სახეებით, ახალი იდეებით, რაც დაეფუძნება წარმატებული სახელმწიფოს მშენებლობის ტრადიციას და მუდმივი განახლების პროცესს.
დღევანდელი გადაწყვეტილება არის ერთიანი ნაციონალური მოძრაობის მუდმივი განახლების და სიმტკიცის ნიმუში“, – აცხადებს მიხეილ სააკაშვილი.
ინფორმაციისთვის: საგანგებო ბრიფინგზე, ენმ-ს აწ უკვე ყოფილმა თავმჯდომარემ, ლევან ხაბეიშვილმა განაცხადა, რომ საპროტესტო აქციაზე, მის მიმართ სამართალდამცავების მიერ განხორციელებული ძალადობის გამო, ჯანმრთელობის მდგომარეობა მკვეთრად გაუუარესდა, რის გამოც, რამდენიმე თვის განმავლობაში, ეფქტურად ვერ განახორციელებდა უფლებამოსილებას, შესაბამისად მიზანშეწონილად ჩათვალა, რომ თანამდებობიდან გადამდგარიყო და თავისი კანდიდატურა, პარტიის ყრილობას, რომელიც უახლოეს პერიოდში გაიმართება, შესთავაზა პოლიტსაბჭოს თავმჯდომარის თანამდებობაზე. ბრიფინგზე, ლევან ხაბეიშვილმა, პარტიის ახალი თავმჯდომარის პოსტზე ყრილობას პარლამენტის ფრაქცია “ერთიანი ნაციონალური მოძრაობის” თავმჯდომარის, თინა ბოკუჩავას კანდიდატურა შესთავაზა.
