იურისტი, სამოქალაქო აქტივისტი ბაჩანა შენგელია პოზიციას აფიქსირებს და განმარტებებს აკეთებს პრეზიდენტ სალომე ზურაბიშვილის მორიგ ინიციატივაზე რეფერენდუმთან დაკავშირებით:
“სალომე ზურაბიშვილის ინიციატივას რეფერენდუმის ჩატარების თაობაზე კატეგორიულად არ ვეთანხმები შემდეგი გარემოებების გამო:
გაცხადებულია და არაერთი გამოკითხვით დადასტურებულია, რომ ქვეყნის ევროპულ მომავალს მხარს უჭერს მოსახლეობის 80%-ზე მეტი;
ძალიან დიდი რისკია ასეთი რეფერენდუმის ჩატარება, როდესაც ზუსტად ვიცით სარეფერენდუმო კითხვაზე, ,,მხარს უჭერთ თუ არა საქართველოს ევრო-ატლანტიკურ კურსს”, ხელისუფლებას და მის მომხრეებს აქვთ უარყოფითი პასუხი. ისინი აქამდე ფარულად, მაგრამ რუსული კანონის მიღების შემდეგ, უკვე ღიად ეწევიან ანტიდასავლურ რიტორიკას.
ხელისუფლება მაქსიმალურად შეეცდება დაწიოს ეს პროცენტი. შესაბამისად, არის რისკი, რომ მივიღოთ გაცილებით დაბალი რიცხვი, ვიდრე ეს დღეს გვაქვს (80%) და ეს კატასტროფის ტოლფასი იქნება.
ასევე, კონსტიტუციის და საარჩევნო კოდექსის თანახმად, რეფერენდუმი ტარდება საქართველოს მთელ ტერიტორიაზე და იურიდიულად ეს მხოლოდ ჩვენი ტერიტორიული მთლიანობის აღდგენის შემდეგაა შესაძლებელი.
თეორიულად, ახლა მხოლოდ პლებისციტის ჩატარებაა შესაძლებელი, რომელსაც მხოლოდ სარეკომენდაციო ხასიათი აქვს. აქ ისმის ითხვა, რის რეკომენდაციას ვუწევთ ხელისუფლებას?
მან ასევე თქვა, ხელმოწერები მოიტანეთო, ალბათ იგულისხმა 200 000 ხელმოწერა, რომელიც საჭიროა რეფერენდუმის დანიშვნის მოთხოვნისთვის. ამხელა რესურსის დახარჯვა ასეთი არაფრისმომტანი და სარისკო ამბისთვის, გაუმართლებელი მგონია“, – წერს ფეისბუქის პირად გვერდზე ბაჩანა შენგელია.
