ყოფილი პრემიერ-მინისტრი, პარტია ,,საქართველოსთვის” თავმჯდომარე, გიორგი გახარია YouTube-ის საკუთარ პლატფორმაზე, გადაცემა ,,გახარიას კვირაში” პოლიტიკურ შეფასებას აკეთებს ქვეყნის ტერიტორიული მთლიანობის აღდგენის საკითხსა და ამ ფონზე, მმართველი პარტიის შესაძლებლობებსა და განხორციელებულ ნაბიჯებთან დაკავშირებით:
,,დღევანდელ ხელისუფლებას არ აქვს არანაირი რესურსი, რომ თუნდაც ოკუპანტს, რუსეთს დაელაპარაკოს ღირსეულად, ტერიტორიული მთლიანობის აღდგენის საკითხებზე. მონობით, რასაც ისინი ესწრაფვიან, არავინ არაფერს არ დაგიბრუნებს.
მარტივად შემიძლია გითხრათ ხელისუფლების 3 წარმომადგენელი, ყველაზე მსხვილი ლიდერი – პრემიერი, ყოფილი პრემიერი, ქალაქის მერი – რომ დააკვირდეთ, ერთმანეთს ეჯიბრებიან არაადეკვატური, ანტიდასავლური მესიჯების და განცხადებების გაკეთებაში მხოლოდ და მხოლოდ იმიტომ, როგორ მოაწონონ თავი რუსეთის პოლიტიკურ ხელმძღვანელობას. ეს არის ჩვეულებრივი შეჯიბრი.
ვინმეს თუ ჰგონია, ან ერთს, ან მეორეს, ან მესამეს, ან იმ მეოთხეს, რომელიც დამალულია, რაიმე რესურსი აქვს პოლიტიკური ან მორალური, ან ინტელექტუალური, ან ექსპერტული, რომ დაელაპარაკოს, ღირსეულად და არა მონობით, საქართველოს ტერიტორიული მთლიანობის აღდგენაზე, ეს წარმოუდგენელია.
რატომ? – როცა რუსეთი ხედავს, რომ შენ გყავს ხელისუფლება სრულად კორუმპირებული, სრულად კორუფციაში ჩაფლული, მხოლოდ იმ მიზნით მამოძრავებელი, რომ ძალაუფლება და ფული შეინარჩუნონ, რა თქმა უნდა, ის არაფერს არ დაგიბრუნებს. ყველაზე მარტივია მსგავს ხელისუფლებაზე ზემოქმედება, მისი მოსყიდვა… და ვინ რას დაუბრუნებს?!”, – განაცხადა გიორგი გახარიამ.
ავტორი
ნინი ხიჯაკაძე
