“ეთნიკურ და კონფესიურ ურთიერთობათა ცენტრის” ხელმძღვანელი, ლელა ჯეჯელავა ჯენზის თაობაზე საუბრობს:
“ჩემს თაობას და ჩვენს შემდგომს, საბჭოეთში ცხოვრების მძიმე გამოცდილება, ისტორიის ცოდნა და დასავლურ კულტურასთან შეძლებისდაგვარად ზიარება დაგვჭირდა იმისთვის, რომ ქვეყნის თავისუფლებისათვის ბრძოლა ჩვენი ცხოვრების საზრისად გვექცია. ეტყობა ეს იყო აქ და ახლა ჩვენი დანიშნულება.
ჯენზის რომ ვეძახით, იმათ, ეს ცოდნა სულ არ ჭირდებათ, მათ იციან რომ თავისუფლებისთვის არიან დაბადებული და იმის მიუხედავად რა იციან რუსეთზე, საქართველოს ისტორიაზე და ევროპულ კულტურაზე, ზურგის ტვინით გრძნობენ, რომ რუსეთი მათი სასიცოცხლო სივრცე არ არის. ქვეცნობიერით გრძნობენ, რომ რუსეთთან ერთად საფრთხე ექმნება მათ არსებობას, იმას რისთვისაც ამ ქვეყნად მოვიდნენ. ამიტომ ეს საფრთხე მყისიერად აერთიანებს მათ მიუხედავად სოციალური, პოლიტიკური, ეთნიკური, რელიგიური თუ გენდერული კუთვნილებისა.
მათ წინააღმდეგ წასვლა დროის, სივრცის, ისტორიული პროცესის, ყოფიერების საზრისის წინააღმდეგ წასვლას ნიშნავს. ასეთი ომი კი კაცობრიობის ისტორიაში ჯერ არავის მოუგია“, – წერს ფეისბუქის პირად გვერდზე ლელა ჯეჯელავა.
