„რაც უფრო ახლოვდება არჩევნები, მით უფრო ძლიერდება საზოგადოებაზე ზეწოლის მიზნით ამუშავებული დეზინფორმაციული მანქანა“, – განაცხადა საპარლამენტო პოლიტიკური ჯგუფის „ხალხის ძალა“ წევრმა დიმიტრი ხუნდაძემ პარლამენტის პლენარულ სხდომაზე საპარლამენტო ოპოზიციის განცხადებების პასუხად.
მისი თქმით, ოპოზიციის წარმომადგენლებმა არასწორი ციფრები წარმოადგინეს სხდომაზე.
„მათ მინდა ვკითხო, თუკი საზოგადოების ბედი მართლა აწუხებთ, რატომ იყო: სიღარიბე მათ დროს 2-ჯერ მეტი, საშუალო ხელფასი 2, 5-ჯერ ნაკლები, პენსია 2-4-ჯერ ნაკლები? ემიგრანტთა რიცხვი 5-ჯერ მეტი, პატიმარი 2,5-ჯერ მეტი, ვიდრე დღეს არის? ისინი ამ ბოლო პერიოდში ხშირად საუბრობენ დემოგრაფიაზე.
წარსულს შევახსენებ, რომ მათ გააუქმეს მრავალშვილიანი დედის სტატუსი, გაყიდეს საბავშვო ბაღები და რაც ვერ გაყიდეს, ის ფასიანი გახადეს. დეზინფორმაციას თავი დაანებეთ, თუმცა მე შემიძლია ბატონ როზნერს მადლობა ვუთხრა, რომ თქვენი, როგორც მატყუარების სახე უფრო კარგად გამოფინა და საზოგადოებისთვის კიდევ უფრო ამოცნობადი გახდით“, – მიმართა დიმიტრი ხუნდაძემ ოპოზიციას.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
