თურქეთში ჩატარებულ მუნიციპალურ არჩევნებს ანალიტიკური შეფასებებით ეხმიანება, რონდელის ფონდის მკვლევარი, აღმოსავლეთმცოდნე, ისტორიის მეცნიერებათა დოქტორი, ზურაბ ბატიაშვილი:
“ბოლო 22 წლის განმავლობაში პირველად ხდება, რომ თურქეთის მმართველი პარტია მარცხდება არჩევნებში.
ამაში გადამწყვეტი როლი ეკონომიკურმა პრობლემებმა შეასრულა.
ოფიციალურად მას ადგილობრივი არჩევნები ჰქვია. თუმცა, ყველა ხვდება, რომ ის გაცილებით დიდი მნიშვნელობისაა და ამ შედეგებს სერიოზული გავლენა ექნება ქვეყნის მომავალ პოლიტიკურ ცხოვრებაზე.
რა თქმა უნდა, სტამბოლში გამარჯვებულ ოპოზიციონერ მერს ექრემ იმამოღლუს ექნება შემდეგ საპრეზიდენტო არჩევნებში მონაწილეობის ამბიცია. მაგრამ მანამდე ის სტამბოლის მერობიდან უნდა გადადგეს და ოპოზიციურ პარტია CHP-ს ჩაუდგეს სათავეში.
და უნდა დავაკვირდეთ აქამდე ჩრდილში მყოფ მაგრამ ახლა მესამე ადგილზე გასულ კონსერვატიულ პარტიას “Yeniden Refah”, რომელმაც წაიღო მმართველი პარტიის ხმები. იდეოლოგიურად ისინი (მმართველი პარტია და “Yeniden Refah”) ერთ პლატფორმაზე დგანან და თავის დროზე ერთიანი პარტიაც იყვნენ.
შედარებით ცუდი შედეგი აჩვენეს ნაციონალისტურმა პარტიებმა და პროქურთულმა ძალებმა. მაგრამ ამ პარტიების შემთხვევაში გადამწყვეტი ის ფაქტორი იყო, რომ ეს ადგილობრივი არჩევნებია.
ხვალ-ზეგ თურქეთის მოქალაქეების მთავარი საკითხი ისევ ეკონომიკური სირთულეები იქნება, რამაც ეს შედეგი გამოიწვია და რომლებიც ადვილად და მოკლე ხანში ვერ მოგვარდება.
მოკლედ, საინტერესო პერიოდი იწყება თურქეთის პოლიტიკურ ცხოვრებაში“, – წერს ფეისბუქის პირად გვერდზე ზურაბ ბატიაშვილი.
