გორის მუნიციპალიტეტში, სოფელ კირბალში, საოკუპაციო ხაზთან ახლოს რუსი სამხედროების მიერ მოკლული საქართველოს მოქალაქის, თამაზ გინტურის ძმა, ნიკოლოზ გინტური ტვ ,,ფორმულას” ჟურნალისტთან მწვავე კომენტარს აკეთებს საქართველოს ხელისუფლების მიმართ მისი ძმის მკვლელების საქმის გამოძიებასთან დაკავშირებით:
,,გუშინ გომელაური გამოვიდა და ,,გარდაცვლილიო”… გარდაცვლილი კი არა, ჩემი ძმა რუსმა ოკუპანტებმა ჩაცხრილეს.
სიების შემდგენებიც თვითონ არიან, წამშლელებიც თვითონ არიან და თუ აინტერესებთ ჩემი ძმის მკვლელობა, გამოიძიებენ კიდევაც. არ იძიებენ, არ აინტერესებთ!
მინისტრის გამოცვლის შემდეგ, საერთოდ აზრი აღარ აქვს ჩვენ მთავრობას რომ მივმართოთ. ჯერ მთავრობა სად არის, სად გვყავს მთავრობა?!
ერთი იმედი გვაქვს, რომ სტრასბურგს მივმართოთ, საქმე მზადდება. სიმართლეს გავიგებთ სტრასბურგში!“, – განაცხადა ნიკოლოზ გინტურმა.
ინფორმაციისთვის: გუშინ, პარლამენტში შინაგან საქმეთა მინისტრის მოსმენა იყო, სადაც ვახტანგ გომელაურმა გინტურის საქმეზეც ისაუბრა და თამაზ გინტურთან დაკავშირებით სიტყვა – ,,გარდაცვლილი” გამოიყენა.
ავტორი
ნინი ხიჯაკაძე
