“სტრატეგია აღმაშენებლის” თავმჯდომარე გიორგი ვაშაძე ბრიუსელიდან “ქართული ოცნების” დამფუძნებელს ბიძინა ივანიშვილს მიმართავს.
ვაშაძის კითხვა ივანიშვილისადმი საქართველოს ეკონომიკურ მდგომარეობას ეხება.
ოპოზიციონერ ლიდერს აინტერესებს თუ რა დაუშავა ბიძინა ივანიშვილს ქართველმა ხალხმა, რომ მხოლოდ ივანიშვილის გარემოცვა მდიდრდება და ქართველი მოსახლეობა ღარიბდება:
„ივანიშვილს მინდა დავუსვა კითხვა ბრიუსელიდან – რა დაგიშავათ ქართველმა ხალხმა?
ასობით ათას ჩვენს თანამემამულეს ფასების ზრდის და შემოსავლის შემცირების გამო უწევს ქვეყნიდან წასვლა. რა დაგიშავათ ხალხმა?! როდემდე უნდა გაგრძელდეს ეს ყველაფერი? როდემდე აპირებთ, რომ მხოლოდ თქვენ და თქვენი გარემოცვა მდიდრდებოდეს და ხალხი ღარიბდებოდეს?
ყველა ჩვენს პატრიოტ ქართველს, ყველა ჩვენს თანამემამულეს სურს ქვეყანაში დაბრუნება. ახლა ვესაუბრეთ ემიგრანტებს ბრიუსელში, მათ უნდათ სამშობლოში დაბრუნება, მაგრამ საქართველოში სამუშაო ადგილები არ არის, ფასები კი უკიდურესად იზრდება და უბრალოდ ვერ არჩენენ საკუთარ ოჯახებს.
ეკონომიკა დღეს მუშაობს თქვენთვის და თქვენი გარემოცვისთვის და სამწუხაროდ არ მუშაობს ხალხისთვის.
კიდევ ერთხელ გისვამთ კითხვას, როდემდე? როდემდე აპირებთ ქვეყნის ძარცვის გაგრძელებას? როდემდე აპირებთ ამ გაუსაძლისი პირობების შექმნას?
და ეს ცინიკური დამოკიდებულება თქვენი პარტიის წარმომადგენლების თითქოს არ იყოს ემიგრაციის პრობლემა, თითქოს არ იყოს ფასების ზრდის პრობლემა, თითქოს არ იყოს უმუშევრობის პრობლემა. რომ ამბობთ ორნიშნად გაიზარდა ეკონომიკაო, ვისთვის? თქვენთვის.
დიახ თქვენთვის გაიზარდა რადგან ეკონომიკა მარტო თქვენთვის მუშაობს და არა ხალხისთვის, ამიტომ გაეცით მთავარ კითხვას პასუხი, როგორ აპირებთ ამ საკითხების მოგვარებას? რატომ ხდება ეს უსამართლობა ქვეყანაში? რატომ უწევს ასიათასობით ადამიანს ქვეყნიდან წასვლა?
ღმერთმა ნუ ქნას რომ 26 ოქტომბერს ყველაფერი არ შეიცვალოს, კიდევ უარესობისკენ წავა ყველაფერი.
მე მჯერა, რომ 26 ოქტომბერი არის დიდი ცვლილებების დღე. ცვლილებების დრო მოვიდა, ჩვენ დავიწყებთ დიდ აღმშენებლობას, გავხდებით ევროკავშირის სრულუფლებიანი წევრი, მოვიზიდავთ ევროპულ და ამერიკულ ინვესტიციებს, შევქმნით მაღალანაზღაურებად სამუშაო ადგილებს და რაც მთავარია დავიწყებთ სრულიად ახალ ეტაპს განვითარების, გაერთიანების და ერთად დგომის.
მჯერა, რომ ჩვენს თანამემამულეებთან ერთად ავაშენებთ საქართველოს სადაც ყველა მოქალაქეს ღირსეული ცხოვრების შესაძლებლობა ექნება“, – განაცხადა ვაშაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
