საქართველოს პარლამენტის თავმჯდომარის მოადგილე, არჩილ თალაკვაძე სააგენტო ,,პარალელის” შეკითხვას პასუხობს მიგრაციის პრობლემასთან დაკავშირებით და განმარტებებთან ერთად, კონკრეტულ შედარებებს აკეთებს:
,,პირველ რიგში მინდა გითხრათ, რომ საზოგადოებრივ აზრზე მანიპულაციის და ჩვენი მოქალაქეების მოტყუების მცდელობა იქნება ის, თუ ვიტყვით, რომ მიგრაცია არის მხოლოდ საქართველოს პრობლემა. არ უნდა შევიქმნათ ასეთი წარმოდგენა, მიუხედავად ოპოზიციის პროპაგანდისა.
მიგრაცია არის, მათ შორის, ჩვენზე ეკონომიკურად ბევრად განვითარებული ქვეყნებიდან, ევროკავშირის წევრი ქვეყნებიდან. თქვენ რომ ნახოთ სტატისტიკა, ძალიან ბევრი ადამიანი ტოვებს ამ წლების განმავლობაში საკუთარ ქვეყანას განვითარებულ ეკონომიკასაც და გადადის უფრო განვითარებულ ეკონომიკებში, საცხოვრებლად თუ სამუშაოდ. ეძებს უფრო უკეთეს პირობებს საცხოვრებლად და რა თქმა უნდა, ევროპასთან ერთად საქართველოც დგას ამ გამოწვევის წინაშე.
გაეროს აქვს სპეციალური ორგანიზაციაც კი შექმნილი მიგრაციასთან დაკავშირებით. ეს არის ,,მიგრაციის საერთაშორისო ორგანიზაცია”, რაც ნიშნავს რომ მიგრაცია უკვე დიდი ხანია გადაიქცა არა მხოლოდ საქართველოს, არამედ განვითარებული ქვეყნების პრობლემად და გამოწვევად.
ახლა რომ ვუპასუხოთ ,,ნაციონალური მოძრაობის” პროპაგანდას, საქართველოდან ემიგრაციის რეკორდი სწორედ ეკუთვნის ,,ნაციონალურ მოძრაობას” – 2011 წელს 107 000-ზე მეტმა მოქალაქემ მხოლოდ ერთ წელს დატოვა ქვეყანა. უარყოფითი ბალანსის რეკორდიც ემიგრაციაში წასულებსა და დაბრუნებულებს შორის ეკუთვნის ,,ნაციონალურ მოძრაობას”.
ხოლო ჩვენი ხელისუფლების პირობებში დაფიქსირდა დადებითი სალდო, როცა დაბრუნდა მეტი ადამიანი, ვიდრე წავიდა ემიგრაციაში. თუმცა ვიმეორებ ამ მიმართულებით ჩვენ გვაქვს მნიშვნელოვანი სამუშაო კიდევ შესასრულებელი.
ეს არის ეკონომიკის შემდგომი ზრდა, საქართველოს დაახლოება ევროპასთან, ევროპულ სტანდარტებთან და ეს არის ქვეყანაში ცხოვრების ევროპული დონის შემოტანა საბოლოოდ, რისთვისაც ჩვენ ვმუშაობთ და გვინდა საქართველო იყოს ევროპული ოჯახის წევრი.
ამას ემატება ისიც რომ ,,ნაციონალური მოძრაობის” მმართველობის პერიოდში საქართველოს არ ჰქონდა უვიზო მიმოსვლის რეჟიმი ევროკავშირთან. გარწმუნებთ, რომ იმ უსამართლობის, იმ მასიური ტერორის, დეზინფორმაციის და დესტაბილიზაციის პირობებში, როცა ადამიანებზე იყო უპრეცედენტო ზეწოლა, ძალადობა, მონოპოლიზებული მედია და სიცრუით ხდებოდა პირდაპირ ქვეყნის მართვა, მაშინ რომ საქართველოს ჰქონოდა უვიზო მიმოსვლის რეჟიმი ევროპასთან, ჩვენს ქვეყანაში სამწუხაროდ, შუქის ჩამქრობიც არ დარჩებოდა იმდენი ადამიანი დატოვებდა ქვეყანას.
ჩვენს პირობებში მიიღო საქართველომ უვიზო მიმოსვლის რეჟიმი, მიუხედავად ამისა ემიგრაციის უარყოფითი ბალანსი და რეკორდი ეკუთვნის ,,ნაციონალურ მოძრაობას”, – განაცხადა არჩილ თალაკვაძე.
ავტორები:
ალექსანდრე ლეჟავა
მარიამ ხაჩირაშვილი
