თბილისის საკრებულოს ფრაქცია ,,ერთიანი ნაციონალური მოძრაობის” თავმჯდომარის მოადგილე, სოფო ჯაფარიძე საგანგებო ბრიფინგზე განცხადებას აკეთებს საქართველოს მე-3 პრეზიდენტის, მიხეილ სააკაშვილის მორიგ მხარდამჭერ მოძრაობასთან დაკავშირებით:
,,სულ მალე, ქვეყნის უახლეს ისტორიაში, უმნიშვნელოვანესი ეტაპი დადგება, როდესაც ქართველმა ხალხმა უნდა გავაკეთოთ არჩევანი სინათლესა და სიბნელეს შორის!
მაშინ, როდესაც ვხედავთ, ჩვენი ევროპელი პარტნიორები, როგორ აქტიურად აკვირდებიან ჩვენს ქვეყანაში მიმდინარე პოლიტიკურ პროცესებს; მაშინ, როდესაც ქართველ ხალხთან ერთად ჩვენი დასავლელი პარტნიორები, მსოფლიოს მრავალი ქვეყნის ლიდერი როგორ მოუწოდებს ჩვენს ხელისუფლებას, რომ დაასრულოს მიხეილ სააკაშვილის პოლიტიკური პატიმრობა – მე ვფიქრობ, რომ სალომე ზურაბიშვილს აქვს შესაძლებლობა მიიღოს ისტორიული გადაწყვეტილება და დაასრულოს მიხეილ სააკაშვილის პოლიტიკური პატიმრობა, როდესაც მან ყველაზე კარგად იცის, თუ ვის ინტერესებს ემსახურება მიხეილ სააკაშვილის პოლიტიკური პატიმრობა, რომ მხოლოდ და მხოლოდ – მტრის ინტერესს ემსახურება. მან ყველაზე კარგად იცის, რომ ეს არის ერის ღირსების შელახვა!
აქედან გამომდინარე, დღეიდან, მთელი საქართველოს მასშტაბით ,,ერთიანი ნაციონალური მოძრაობა”, მიხეილ სააკაშვილის ასი ათასობით ამომრჩეველთან და მხარდამჭერთან ერთად, ვიწყებთ ხელმოწერების შეგროვებას.
მივმართავ ქართველ ხალხს, ჩვენ გვაქვს დღეს შანსი, რომ დავასრულოთ ქვეყნისთვის ძალიან დამაზიანებელი პოლიტიკური პატიმრობა.
1 მარტს 3 საათზე ჩვენ ყველა ერთად სალომე ზურაბიშვილს გადავცემთ მთელი საქართველოს მასშტაბით შეგროვებულ ხელმოწერებს“, – განაცხადა სოფო ჯაფარიძემ.
ავტორი
ნინი ხიჯაკაძე
