“ბიძინა ივანიშვილის, ღარიბაშვილის ოლიგარქიული კლანი ისე მართავს ამ ქვეყანას, რომ აქ არ შემოდიან დამოუკიდებელი, საერთაშორისო კომპანიები ინვესტიციებისთვის, რის გამოც ჩვენ გვაწუხებს უმუშევრობა, ფასების ზრდა, უმძიმესი ეკონომიკური ვითარება”, – ამის შესახებ „სტრატეგია აღმაშენებლის“ თავმჯდომარემ, გიორგი ვაშაძემ პარლამენტში გამართულ ბრიფინგზე, რუსული ბაზრიდან გასულ საერთაშორისო კომპანიებთან დაკავშირებით განაცხადა.
როგორც ოპოზიციონერი ლიდერი აღნიშნავს, საერთაშორისო ბრენდებთან დღემდე მჭიდრო კომუნიკაცია აქვს და 2024 წლის არჩევნებში გამარჯვებისთანავე, ისინი ქართულ ბაზარზე გამოჩნდებიან.
მისივე თქმით, აღნიშნული კომპანიები საქართველოში არსებულ მძიმე ეკონომიკურ ვითარებასა და სამუშაო ადგილების პრობლემას აღმოფხვრის:
„N1 პრობლემა საქართველოში არის უმუშევრობა, ღირსეული და მაღალანაზღაურებადი სამუშაო ადგილების არარსებობა. შემიძლია, ძალიან კონკრეტული ციფრები წარმოვუდგინო მოქალაქეებს.
თქვენ ხედავთ კომპანიების იმ მცირე ჩამონათვალს, რომელთაც დატოვეს რუსეთის ბაზარი. საუბარია 5000-ზე მეტ ბრენდზე, რომელმაც 2022-23 წლებში დატოვა რუსული ბაზარი. ჯამურად რომ გითხრათ, ეს არის დაახლოებით 2 მლნ მაღალანაზღაურებადი სამუშაო ადგილი, კომპანიებში, როგორიცაა „მერსედესი“, „ფოლკსვაგენი“, „ეფლი“, „გუგლი“, „ამაზონი“, „მიცუბიში“, „ფერარი“, „ჯენერალ მოტორსი“ და ა.შ. მის გარშემო შექმნილი იყო 4 დან 6 მლნ-მდე სამუშაო ადგილი, ჯამურად ამ კომპანიების ღირებულება არის 266 მლრ დოლარი, სწორედ ამ კომპანიებმა დატოვეს რუსეთის ფედერაცია.
მთავარი კითხვაა – სად წავიდნენ ეს კომპანიები? ისინი პროდუქციას მთელ ევრაზიას რუსეთიდან აწვდნიდნენ. აი, წარმოგიდგენთ ევრაზიის რუკას და ნახავთ, რომ ეს კომპანიები წავიდნენ აზერბაიჯანში, თურქეთში, ყაზახეთში, უზბეკეთში, დუბაიში, ბულგარეთში, ისრაელსა და სხვა ქვეყნებში.
არცერთი ეს კომპანია არ შემოსულა საქართველოში. კითხვა უნდა დავსვათ – რატომ? რატომ წავიდა აზერბაიჯანში მაგალითად და არა საქართველოში? რატომ წავიდა უზბეკეთში? აღარაფერს ვამბობ დუბაიზე, თურქეთზე. მიზეზი არის ძალიან კონკრეტული, რომ სამწუხაროდ, ბიძინა ივანიშვილის, ღარიბაშვილის ოლიგარქიული კლანი ისე მართავს ამ ქვეყანას, რომ აქ არ შემოდიან დამოუკიდებელი, საერთაშორისო კომპანიები ინვესტიციებისთვის, რის გამოც ჩვენ გვაწუხებს უმუშევრობა, ფასების ზრდა, უმძიმესი ეკონომიკური ვითარება.
როცა სისტემას მართავ კორუფციით, არაფორმალური მმართველობით, კლანური სასამართლოთი, იქ ინვესტიციები არ შედის. ჩემო კარგებო, წლევანდელი წელი სწორედ ეს არის – ჩვენ ვქმნით სამუშაო ადგილებს, შემოგვყავს ეს კომპანიები საქართველოში თუ ისევ და ისევ სიღარიბის, ივანიშვილისეულ ჭაობში ვიძირებით.
აი, ძალიან კონკრეტული მაგალითია, თუ როგორ შეიძლებოდა ასობით მლრდ ინვესტიციების მოზიდვა. სულ რაღაც 5-7% რომ შემოსულიყო საქართველოში, ეს უკვე მოაგვარებდა უმუშევრობის პრობლემას საქართველოში.
ჩვენ დღეს ევროკავშირის კანდიდატის ქვეყანა ვართ. მერწმუნეთ, ინვესტორებისთვის გაცილებით საინტერესო ვართ, ვიდრე აზერბაიჯანი, თუნდაც უზბეკეთი, მაგრამ ისინი აქ არ შემოდიან, რადგან არაფორმალური მმართველობის, კორუფციული მმართველობის და კლანური სასამართლოს პირობებში არავის არ უნდა ინვესტიციების ჩადება.
წელს ჩვენ უნდა გავათავისუფლოთ საქართველო და დავიწყოთ მძლავრი ეკონომიკური განვითარების პროცესი ქვეყანაში. ყველა ამ კომპანიასთან ჩვენ კონტაქტი გვექნება, ბევრთან დღემდე მაქვს კონტაქტი, შევხვდით კიდეც სხვადასხვა ქვეყნებში და გამარჯვებისთანავე, ამ ადამიანებს შემოვიყვანთ საქართველოში, რათა საქართველოს მოალაქეებს ქონდეთ ღირსეული და მაღალანაზღაურებადი სამუშაო ადგილები”, – განაცხადა გიორგი ვაშაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
