საქართველოს პარლამენტის წევრი, პარტია ,,ლელოს” პოლიტიკური მდივანი, სალომე სამადაშვილი ჟურნალისტებთან კომენტარს აკეთებს ევროპულ მედიაგამოცემა ,,პოლიტიკოს” მიერ მომზადებულ მასალასთან დაკავშირებით, სადაც სიაში ასევე მოხვდა ბიძინა ივანიშვილი:
,,პირველად ხდება, რომ საქართველოს წარმომადგენელი ხვდება იმ ადამიანების სიაში, რომლებიც ხელს უშლიან ევროკავშირის სტრატეგიული ამოცანების განხორციელებას და უპირისპირდებიან ევროკავშირის პოლიტიკას.
ამით მე ვფიქრობ, რომ ყველაფერი უკვე არის ნათქვამი, მათ შორის ის, თუ ვის გულისხმობს ევროკავშირი, როდესაც საუბრობს დეოლიგარქიზაციაზე ჩვენს ქვეყანაში.
სწორედ რუსი ოლიგარქი, რომელსაც დღეს მიტაცებული აქვს სახელმწიფო, ჩვენს ქვეყანაში და ცდილობს, რომ საკუთარი გავლენა გამოიყენოს რუსეთის სასარგებლოდ და ევროკავშირის და ქართველი ხალხის სტრატეგიული ინტერესების წინააღმდეგ, სწორედ მასზე არის საუბარი, როდესაც დეოლიგარქიზაციას გვთხოვს ჩვენ ევროკავშირი“, – განაცხადა სალომე სამადაშვილმა.
ინფორმაციისთვის: ევროპულ გამოცემა Politiko-ს მიერ გამოქვეყნებულ სტატიაში ამრევების (disrupters – ადამიანები, რომლებიც ვითარებას უარესობისკენ მოულოდნელად ცვლიან) სიაში ,,ქართული ოცნების” დამფუძნებელი, ყოფილი პრემიერ-მინისტრი, ბიძინა ივანიშვილი აღმოჩნდა, იგი ჩამონათვალში მე-8 ადგილს იკავებს და მას Politiko ოლიგარქად მოიხსენიებს, რომელსაც სურს საქართველო რუსეთისკენ წაიყვანოს.
ავტორი
მარიამ ხაჩირაშვილი