პარლამენტის რეგიონალური კომიტეტისა და თვითმმართველობის კომიტეტის თავმჯდომარის პირველი მოადგილე, ირაკლი ზარქუა მწვავე კრიტიკულ შეფასებას აკეთებს პრეზიდენტ სალომე ზურაბიშვილის მიერ განხორციელებულ მორიგ ევროპულ ვიზიტთან და ინტერვიუსთან დაკავშირებით, რომელიც ფრანგულ ტელეკომპანია ,,FRANCE 24”-თან გააკეთა:
,,ქალბატონი სალომე მაინც არ იშლის ჯიუტობას და აგრძელებს მოგზაურობებს, დასვენებებს, ეტყობა, ახლობლების მონახულებას – საფრანგეთშია ხშირად და მაგიტომ. თუმცა, თქვენ იცით, ლეგიტიმაცია არ აქვს. ის კონსტიტუციას არღვევს. შესაბამისად, ჩვენი მხრიდან, საქართველოს მოსახლეობის უმრავლესობის მიერ არჩეული ხელისუფლების მხრიდან, მას ლეგიტიმაცია არ აქვს.
ქალბატონი სალომე, ბოლო 2 წელია, იმ რადიკალების ნარატივზე გადაბარგდა. არ ვიცი, რა პროცესი აქვთ ერთმანეთში, როგორ მოხდა, მაგრამ ის, რომ საქართველოს პარლამენტის ტრიბუნიდან გამოხვალ და იტყვი ,,ეს ფსევდორეფორმა არის, არ იმსახურებს კანდიდატის სტატუსსო“, მერე რომ ჩახვალ, ინტერვიუს მისცემ ,,ბატონ პრემიერში არ ვარ დარწმუნებული, უნდა თუ არა კანდიდატის სტატუსიო“ – ეს მავნებლობაა.
ვერ დავაბრალებ, რომ ქალბატონ სალომეს უყვარს ქვეყანა და უნდა კანდიდატის სტატუსი. არა! მავნებლობდა და მავნებლობის შედეგად ჩვენ შევუზღუდეთ გადაადგილება. ჯიუტობს, მაგრამ კონსტიტუციის დარღვევით მაინც გადაადგილდება.
ასეთი რადიკალი ე.წ. პრეზიდენტი ჩვენთვის ის არ არის. ჩახდილებთან იქნება თუ ხელმოცარულებთან, სიმართლე გითხრათ, ნაკლებად გვაინტერესებს და არ არის ჩვენი ინტერესის სფერო“, – განაცხადა ირაკლი ზარქუამ.
ავტორი
ნინი ხიჯაკაძე
