“თუ საქართველო მიიღებს კანდიდატის სტატუსს, ეს იქნება გეოპოლიტიკური თვალსაზრისით, საქართველოს მოქალაქეების დამსახურებით და დათქმებით” – ხატია დეკანოიძე

საპარლამენტო პოლიტიკური ჯგუფის ,,ევროოპტიმისტების” წევრი, ხატია დეკანოიძე ჟურნალისტებთან კომენტარს აკეთებს ევროკომისარის სამეზობლო და გაფართოების საკითხებში, ოლივერ ვარჰეის განცხადებასთან დაკავშირებით:

,,რეკომენდაციების კონტექსტში, ჩვენ გვაქვს ძალიან სერიოზული ჩავარდნა. მე ვარჰეის განცხადებას ვუსმინე, მაგრამ საქართველო მართლმსაჯულების, მედია თავისუფლების და ძალიან ბევრი მიმართულებით, ასე ვთქვათ, ამ კონტექსტში, განსაკუთრებით არჩევნები, რეპრესიები, რაც ხდება სკოლის დირექტორებზე და ა.შ. არის ძალიან უკან.

თუ საქართველო კანდიდატის სტატუსს მიიღებს, ეს იქნება გეოპოლიტიკური თვალსაზრისით, საქართველოს მოქალაქეების დამსახურებით და ეს იქნება დათქმებით“, – განაცხადა ხატია დეკანოიძემ.

ინფორმაციისთვის: ევროკომისარი სამეზობლო და გაფართოების საკითხებში, ოლივერ ვარჰეი პრემიერ ირაკლი ღარიბაშვილთან შეხვედრის შემდეგ, twitter-ის ოფიციალურ გვერდზე პოსტს აქვეყნებს, სადაც აღნიშნავს: ,,კარგი იყო საქართველოს პრემიერ-მინისტრ ირაკლი ღარიბაშვილთან შეხვედრა. შევაფასეთ 12 ძირითადი პრიორიტეტის შესრულებისთვის საქართველოს ბოლოდროინდელი ძალისხმევა, რაც აისახება გაფართოების ანგარიშში.

ქვეყნის ძალისხმევა კარგად იქნა მიღებული. საქართველო ევროკავშირის ოჯახს მიეკუთვნება და ყველა მხარდაჭერას მიღებს ევროკავშირისკენ მიმავალ გზაზე“.

ავტორი
მარიამ ხაჩირაშვილი