საკონსტიტუციო სასამართლოს გადაწყვეტილებით, პრეზიდენტმა სალომე ზურაბიშვილმა კონსტიტუცია დაარღვია. პროცესმა კი პარლამენტში გადაინაცვლა. პრეზიდენტის იმპიჩმენტისთვის 100 დეპუტატის ხმა არის საჭირო. თემასთან დაკავშირებით ჟურნალისტებთან კომენტარი გააკეთა პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, მიხეილ სარჯველაძემ. მან ასევე შეფასება გააკეთა საქართველოს პრეზიდენტის განცხადებასთან დაკავშირებითაც:
,,პრეზიდენტი ვისაც ეყრდნობოდა, აი ამ არასწორი გადაწყვეტილების მიღების დროს, როდესაც გადაწყვიტა კონსტიტუციის საწინააღმდეგოდ ემოქმედა, იმათთან მიმართებაშიც კი არ აქვს მყარი დასაყრდენი და სანდოობა.
აქედან გამომდინარე არის ის მოწოდებაც, რომელსაც პრეზიდენტი აკეთებს, რომ დარბაზში, უშუალოდ კენჭისყრის დროს ვინმე არ იმყოფებოდეს. როგორც ჩანს ის ზედმეტად უფრთხილდება თავის სკამს.
[ჟურნალისტის შეკითხვა]: სალომე ზურაბიშვილმა ასეთი განცხადება გააკეთა, რომ ,,პატარა კაცებთან მარტო მინდა ყოფნაო“…
ეს ერთ-ერთი ყველაზე მდაბიო განცხადება იყო, რომელიც პრეზიდენტმა ამ გამოსვლისას და არა მხოლოდ ამ გამოსვლისას გააკეთა. აი, ყველაზე მდაბიო და შეუფერებელი პრეზიდენტის ინსტიტუტთან.
ოპონენტების შერჩევა არ არის აუცილებელი და შემდეგ მონათვლა რაღაცა არასწორი იარლიყებით. მე მგონია, რომ მის მდაბიურ დამოკიდებულებაზე მიუთითებს“, – განაცხადა მიხეილ სარჯველაძემ
ინფორმაციისთვის: საკონსტიტუციო სასამართლოს გადაწყვეტილების შემდეგ პრეზიდენტმა, სალომე ზურაბიშვილმა მიმართვა გაავრცელა, სადაც კრიტიკულად ისაუბრა მმართველი პარტიის წარმომადგენელებზე.
ავტორი
მარიამ ხაჩირაშვილი
