„გამარჯვების პლატფორმამ“ წყალტუბოს რაიონში, სოფელ უკანეთში, სიმბოლურად, საქართველოსა და ევროკავშირის დროშები აღმართა. „სტრატეგია აღმაშენებლის“ თავმჯდომარის, “გამარჯვების პლატფორმის” ერთ-ერთი ლიდერის გიორგი ვაშაძის თქმით, დაწყებულია კამპანია – „ევროკავშირი საქართველოსთვის“, რომლის ფარგლებშიც ისინი არაერთ რაიონსა თუ სოფელში ჩავლენ. ოპოზიციონერ ლიდერს მიაჩნია, რომ საქართველოს – სტაბილურობისთვის, უსაფრთხოებისა და ეკონომიკური დამოუკიდებლობისთვის აუცილებლად სჭირდება ევროკავშირი:
„ვიწყებთ კამპანიას – „ევროკავშირი საქართველოსთვის“. ყველა სოფელში ჩავალთ და ასე, სიმბოლურად, საქართველოსა და ევროკავშირის დროშებს ავღმართავთ, იმიტომ, რომ სოფლების გაძლიერებას სჭირდება სწორედ ევროკავშირი და სამუშაო ადგილებს და საქართველოში ხალხის დაბრუნებას სჭირდება ევროკავშირი.
საზოგადოებას მინდა ვუთხრა, რომ საიდანაც მოგვწერთ, ყველგან ჩამოვალთ და ავღმართავთ დროშებს.
ამ სოფლიდან ვიწყებთ, მათ შორის, იმიტომ, რომ „ქართულ ოცნებას“ აქ 2012 წლის მერე არჩევნები არ მოუგია. რუსეთი საქართველოში არასდროს არ იქნება და ყოველთვის ევროპისკენ უნდა ვიაროთ, ხშირად გვექნება მსგავსი სიმბოლური ღონისძიებები, ამით ჩვენ ევროპულ პარტნიორებსაც ვუგზავნით მესიჯს, რომ ქართულ საზოგადოებას უნდა ევროკავშირი“, – განაცხადა ვაშაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” საზოგადოებასთან ურთიერთობის სამსახური ავრცელებს
